Jeŭropa sutyknułasia z rekordnymi cenami na haz
Jeŭropa sutyknułasia z rekordnymi cenami na haz. Ceny, jakija rastuć, padsiłkoŭvajuć inflacyju i pahražajuć zatarmazić adnaŭleńnie ekanomiki paśla 2020 hoda, što prajšoŭ na fonie tatalnaha łakdaŭnu, paviedamlaje Bloomberg.
Fota Nadziei Bužan.
Ceny rastuć, niahledziačy na toje, što zima jašče nie nastupiła i popyt adnosna nizki. Uzimku ceny čakajucca jašče vyšejšyja.
«Prablema jašče navat nie pačałasia, — skazaŭ Žuljen Chaaro, kiraŭnik EnergyScan, analityčnaha padraździaleńnia francuzskaj kampanii Engie SA, — Jeŭropu čakaje vielmi surovaja zima».
Jeŭrapiejskija fjučarsy na haz, što tarhujucca ŭ Niderłandach, vyraśli ŭ paniadziełak da rekordnaha ŭzroŭniu, jak i ceny ŭ Vialikabrytanii.
Haračaje nadvorje i nizkaja chutkaść vietru strymlivajuć vytvorčaść adnaŭlalnaj enierhii, stymulujučy vykarystańnie hienieracyi na vykapniovym palivie i padvyšajučy ceny na vuhal bolš čym na 70% u Jeŭropie ŭ hetym hodzie.
Jeŭropa sutyknułasia z hazavym kryzisam paśla taho, jak surovaja zima pryviała da apustašeńnia schoviščaŭ. Pavialičyć zapasy, jakija znachodziacca na samym nizkim uzroŭni bolš čym za dziesiacihodździe, było niaprosta, pakolki Rasija, jak hałoŭny pastaŭščyk, abmiažoŭvała pastaŭki ŭ Jeŭropu na fonie pavyšanaha popytu ŭ Azii.
Jeŭropa taksama nie moža raźličvać na ŭłasnuju vytvorčaść, unutranaja vytvorčaść skaračajecca.
Pryrodny haz u Jeŭropie kaštuje ŭ naftavym ekvivalencie bolš za 100 dalaraŭ za baral, h. zn. daražej za naftu. Albo 650 dalaraŭ za 1000 kubamietraŭ.
Imklivy rost cen na enierhanośbity ŭžo pryvioŭ da taho, što inflacyja ŭ Hiermanii dasiahnuła samaha vysokaha ŭzroŭniu z 2008 hoda. Ceny vyraśli na 3,4% u žniŭni.
Na enierhietyčnym rynku Vialikabrytanii ŭžo nazirajucca prykmiety napružanaści, i jašče navat nie pachaładała.
Bolš vysokija ceny na haz robiać vuhalnuju hienieracyju bolš prybytkovaj.
Pakul što nieviadoma, jak hety rost cen paŭpłyvaje na Biełaruś — naša kraina kuplaje rasijski haz nie pa rynkavaj canie.
