«Hety kryzis jość sprobaj vyklikać chaos». Premjer i šef Pamiežnaj słužby Polščy raskazali pra abstanoŭku na biełaruskaj miažy
Premjer-ministr Matevuš Maraviecki, ministr unutranych spraŭ i administracyi Maryjuš Kamiński i kiraŭnik pamiežnaj słužby Tomaš Praha praviali siońnia pres-kanfierencyju, pryśviečanuju stanovišču na biełaruska-polskaj miažy.
PAP
Pa słovach kiraŭnika polskaha MUS Maryjuša Kamińskaha, z momantu ŭviadzieńnia režymu nadzvyčajnaha stanovišča na minułym tydni na miažy ź Biełaruśsiu, było zafiksavana 457 sprobaŭ nielehalnaha pierasiačeńnia miažy, a z pačatku žniŭnia było bolš za 4000 sprobaŭ.
Pa słovach premjera Maravieckaha, łahier biežancaŭ pobač z Usnaž-Hurnym — heta prykryćcio dla arhanizavanaj akcyi biełaruskich viedamstvaŭ, — miarkuje Maraviecki.
«Biełaruskija słužby zabiaśpiečvajuć mihrantaŭ śpiecsrodkami, charčavańniem, dapamahajuć im u sprobach pierasiačeńnia polskaj miažy», — miarkuje premjer.
Što da budučych vučeńniaŭ «Zachad-2021», što majuć raspačacca 10 vieraśnia, to premjer-ministr ličyć, što heta tolki pavialičyć napružańnie. «Praź niekalki dzion pačnucca najbujniejšyja za 40 hadoŭ vajskovyja vučeńni «Zachad-2021».
Padčas ich mohuć być raspačatyja sproby pravakacyj. Užo siońnia na miažy byli čutnyja vybuchi na prylehłych palihonach. Takoj napružanaj situacyi na miažy ŭ nas nie było apošnija 30 hadoŭ. Hety kryzis jość sprobaj vyklikać chaos».
Sytuacja na granicy z Białorusią. ⤵ pic.twitter.com/zqBT3myqph
Jak zaznačyŭ Maryjuš Kamiński, mihranty zabiaśpiečanyja charčavańniem, adzieńniem, spalnymi miaškami. Ich padvoziać na miažu. Pamiežnaja słužba identyfikuje novyja asoby.
Sytuacja na granicy z Białorusią. ⤵ pic.twitter.com/acpfrX1lRH
«Bolšaja častka asob, jakija pierasiakajuć miažu, — hramadzianie Iraka, jakija samalotam dabralisia z Bahdada ŭ Minsk». Pa jaho słovach, jość hrupa z Afhanistana, adnak ich nie varta źviazvać z apošnimi padziejami — heta ludzi, jakija niekalki hadoŭ znachodzilisia na terytoryi Rasii. «Byli tam i pracavali lehalna, ale im było prapanavana pierabracca ŭ ES. Jany płaciać u siarednim 5,5 tysiačy dalaraŭ za čałavieka [za pasłuhi pa tranśfiery ŭ ES]. Bolšaja častka ździŭlenaja, što jany trapili ŭ Polšču, a nie ŭ Niamieččynu», — zaznačyŭ Kamiński.
Na dumku šefa Pamiežnaj słužby Tomaša Prahi, ź biełaruskaha boku ciapier znachodzicca blizu dziesiaci tysiač mihrantaŭ.
«Mihrantaŭ zabirajuć u Minsku, pa ich pryjazdžajuć mikraaŭtobusy, jakija zatym nakiroŭvajucca da miažy, — dadaŭ Kamiński. — Tam ich prymajuć ludzi ŭ maskach, u formie i sa zbrojaj, viaduć ich na miažu i pakazvajuć miescy pierachodu. Časam staviać leśvicy, stvały dreŭ, kab mihranty mahli pieraleźci praz płot, adnak my ich zatrymlivajem z praktyčna stoadsotkavaj vynikovaściu».
Na pres-kanfierencyi taksama było ŭźniata pytańnie mahčymaj kampiensacyi miascovym pradprymalnikam za ŭźviadzieńnie nadzvyčajnaha stanovišča.
