U Čarnahoryi prajšli pratesty pierad inaŭhuracyjaj novaha kiraŭnika pravasłaŭnaj carkvy
U subotu ŭ byłoj stalicy Čarnahoryi Cecine pratestoŭcy sutyknulisia z sotniami śpiecnazaŭcaŭ. Udzielniki pratestu zbudavali barykady z šyn i kamianioŭ napiaredadni inaŭhuracyi novaha kiraŭnika Sierbskaj pravasłaŭnaj carkvy ŭ Čarnahoryi. Pra heta sa spasyłkaj na AR paviedamlaje «Radyjo Svaboda».
Cyrymonija, zapłanavanaja na niadzielu ŭ Cetyne, vyklikała hnieŭ praciŭnikaŭ sierbskaj carkvy ŭ Čarnahoryi, jakaja abviaściła niezaležnaść ad susiedniaj Sierbii ŭ 2006 hodzie.
U subotu sotni pratestoŭcaŭ sutyknulisia z palicyjaj u Cetyne i na karotki čas źniali mietaličnuju aharodžu vakoł klaštara, dzie pavinna adbycca inaŭhuracyja mitrapalita Iaanikija. Čarnahorskaje dziaržaŭnaje telebačańnie RTCG paviedamiła, što pratestoŭcy prarvali palicejskuju błakadu na ŭjeździe ŭ Cetyne i zakidali ich kamianiami z krykami «Heta Čarnahoryja!» i «Heta nie Sierbija!».
Čarnahorcy zastajucca hłyboka padzielenymi adnosna suviaziaŭ svajoj krainy z susiedniaj Sierbijaj i ź Sierbskaj pravasłaŭnaj carkvoj, jakaja źjaŭlajecca hałoŭnym relihijnym instytutam krainy. Kala 30% z 620 tysiač žycharoŭ Čarnahoryi ličać siabie sierbami.
Tysiačy ludziej pratestavali ŭ minułym miesiacy, patrabujučy, kab inaŭhuracyja adbyłasia ŭ inšym miescy. Carkva admoviłasia mianiać svaje płany.
Z taho času, jak Čarnahoryja adździaliłasia ad Sierbii, čarnahorcy, jakija vystupajuć za niezaležnaść, vystupajuć za ŭtvareńnie pravasłaŭnaj carkvy, asobnaj ad sierbskaj.
