U Arhiencinie, dzie 11 miljonaŭ pryščapilisia «Sputnikam», apublikavali spravazdaču pa pabočkach ad vakcyny. Na što skardzilisia ludzi?
Arhiencinskaje Ministerstva achovy zdaroŭja apublikavała spravazdaču ab pabočnych efiektach rasijskaj vakcyny «Sputnik», jakuju vykarystoŭvajuć u krainie z pačatku hoda, pieradaje Bi-bi-si. Arhiencina druhoj siarod zamiežnych krain dazvoliła ŭ siabie vykarystoŭvać hetuju vakcynu, i ciapier joj pryščeplena bolš za 11 młn čałaviek.
Spravazdača zasnavana na źviestkach, atrymanych da 31 lipienia hetaha hoda. U Arhiencinie «Sputnik» i AstraZeneca — dźvie samyja papularnyja vakcyny, imi pryščeplena amal roŭnaja kolkaść ludziej.
Usiaho nasielnictvu krainy ŭviali 11,37 młn doz «Sputnika», 11,1 młn doz AstraZeneca i 9,7 młn doz kitajskaj Sinopharm.
Za siem miesiacaŭ, jakija prajšli paśla pačatku masavaj vakcynacyi, nacyjanalnaja sistema achovy zdaroŭja zarehistravała 50 463 spravazdačy ab pabočnych efiektach (156,8 vypadku na 100 tysiač). Ź ich 1,99% (1004 vypadki) paličyli ciažkimi pabočnymi efiektami — heta značyć, jany zapatrabavali špitalizacyi.
Vypadkaŭ surjoznych pabočak paśla «Sputnika» — mienš za 1% ad ahulnaj kolkaści. 38 669 vypadkaŭ pabočnych efiektaŭ paśla rasijskaj vakcyny paličyli niaciažkimi.
Bolšaść spravazdač ab tych ci inšych pabočnych efiektach pastupili pa «Sputniku», pa AstraZeneca — 2999 spravazdač, pa Sinopharm — 2384. Jašče 3535 vypadkaŭ nie źviazana ni z adnoj z vakcyn.
Apublikavali ŭ Arhiencinie i raźmierkavańnie kolkaści ciažkich pabočnych efiektaŭ u zaležnaści ad vakcyny:
- «Sputnik» — 0,66 vypadku na 100 tysiač doz
- AstraZeneca — 0,41 vypadku na 100 tysiač doz
- Sinopharm — 0,16 vypadku na 100 tysiač doz
72% spravazdač ab niepažadanych źjavach byli ad žančyn, a siaredni ŭzrost tych, chto ziaviŭ ab pabočkach, składaŭ 42,4 hoda siarod abodvuch połaŭ.
U spravazdačy padkreślivajecca, što stupień reahavańnia sistemy epidnahladu na pabočki ŭ pačatku vakcynacyi była vielmi vysokaj z-za taho, što vakcyny pačali ŭžyvać va ŭmovach pandemii i ŭsie jany byli novymi. Heta značyć, miedpiersanał byŭ navučany vyjaŭlać pabočki i chutka apaviaščać pra ich.
Choć kolkaść atrymanych ludźmi doz vakcyn z časam pavialičvałasia, kolkaść paviedamleńniaŭ ab ciažkich pabočnych efiektach zastavałasia nizkaj, adznačajuć u arhiencinskim Ministerstvie achovy zdaroŭja.
Na što čaściej skardzilisia?
Čaściej za ŭsio paśla «Sputnika» rehistravali hałaŭny bol abo bol u ciahlicach/sustavach — (136,2 vypadku na 100 tysiač). Taksama byli vypadki lichamanki z hałaŭnym bolem i/abo bolami ŭ ciahlicach i sustavach (128,5 vypadku), miascovaj reakcyi bieź lichamanki — 26,9 vypadku na 100 tysiač.
Radziej sustrakałasia vysokaja tempieratura — 16,5 vypadku na 100 tysiač, miascovy bol — 11,4 vypadku, miascovaja reakcyja ź lichamankaj — vosiem vypadkaŭ, reakcyi straŭnikava-kišačnaha trakta ź lichamankaj abo biez — šeść vypadkaŭ, stolki ž — alerhij.
Zusim redkija pabočnyja efiekty «Sputnika» — heta miascovyja adenapatyi (pavieličeńnie limfavuzłoŭ — Bi-bi-si) — takich sustrakałasia 0,83 vypadku na 100 tysiač, anafiłaksii (0,10 na 100 tysiač), mietaličny prysmak u rocie (0,08) i hipiertermija (0,05).
Dzieviać vypadkaŭ arhiencinskaje Ministerstva achovy zdaroŭja adniesła da niavyznačanych, to-bok ich nielha było dakładna źviazać z vakcynacyjaj. Siarod takich — try vypadki sindromu Hijena-Bare (vostraja aŭtaimunnaja zapalenčaja reakcyja), piać — roznyja trombacytapienii i adzin vypadak pierykardytu (zapalenčaha paražeńnia sieroznaj abałonki serca).
Aŭtary spravazdačy padkreślivajuć, što pa miery pastupleńnia novaj infarmacyi źviestki ab pabočnych efiektach mohuć źmianiacca i ŭdakładniacca.