«Z 19 nastaŭnikaŭ 11 zvolnili». Jak nastaŭniki zhubili pracu za pazicyju
Paśla vybaraŭ mnohija nastaŭniki adkryta vykazvali svaju pazicyju. «Naša Niva» pacikaviłasia ich losam: mnohija byli zvolnieny i nie viarnulisia ŭ dziaržaŭnuju sistemu.
«Nu vy ž razumiejecie, što pracavać nie budziecie»
U kastryčniku minułaha hoda nastaŭniki 50-j himnazii Minska zapisali videazvarot. Jany vykazalisia suprać pieraśledu za inšadumstva i hvałtu nad pratestoŭcami. Z 19 piedahohaŭ, što źnialisia ŭ roliku, 11 zvolnilisia. Siarod ich — pradmietniki pa anhielskaj movie, chimii, historyi, nastaŭnik pačatkovaj škoły, piedahoh-arhanizatar.
«Paśla vychadu videa ja razumieła, što ŭ luby momant moža być zvalnieńnie, ale była hatova. Sa mnoj praviali niekalki hutarak, padčas jakich hučała fraza: «Nu vy ž razumiejecie, pryjdzie novaje kiraŭnictva i vy pracavać nie budziecie». U adzin ź dzion mianie vyklikali, adabrali telefon i sprabavali prymusić napisać zajavu na zvalnieńnie pa asabistym žadańni, prynieśli asabistuju spravu i pracoŭnuju knižku.
Samaje dziŭnaje, što jany padkreślivali: ty sama pavinna syści. Kali ja zadała pytańnie, ci jość pa majoj pracy narakańni, skazali, što nie. Ja admoviłasia zvolnicca.
Na nastupnym tydni pa himnazii chadzili razmovy, što mnoj cikaviacca i zapytvali maju charaktarystyku. Plus u toj čas my pisali tłumačalnuju zapisku, čamu zdymalisia ŭ roliku. Usia hetaja napružanaja atmaśfiera, pieryjadyčnyja hutarki, kantrol maich asabistych sacsietak pryviali da taho, što ja vyrašyła źjechać za miažu. Zajavu na zvalnieńnie pisała pa pahadnieńni bakoŭ», — raskazvaje nastaŭnica historyi Taćciana Hajduk, jakaja syšła z himnazii ŭ lutym.
Inšaja vykładčyca (jana taksama pakinuła škołu pa pahadnieńni bakoŭ) dzielicca, što zvalnieńnie prachodziła praz prydzirki da pracy:
«Na miesca zvolnienych supracoŭnikaŭ, nakolki viedaju, nikoha pastajannaha jašče nie znajšli. Prychodzili dziaŭčaty, ale paśla vypusknoha i jany syšli, bo pracavać było niemahčyma».
Piedahoh sprabavała ŭładkavacca ŭ turystyčny centr, ale dyrektar centra adrazu joj admoviŭ. Niekatoryja z kaleh znajšli pracu ŭ pryvatnych škołach.
«Źviartaŭsia ŭ niekalki rajonaŭ, ale paŭsiul admaŭlajuć»
Dva nastaŭniki z ahraharadka Dobraja (Horacki rajon) taksama byli zvolnieny paśla videazvarotu. Alaksandr Krušaŭ, jaki vioŭ u sielskaj škole infarmatyku, pavinien byŭ jašče i viarnuć hrošy ŭniviersitetu za niedabytaje raźmierkavańnie (jon vučyŭsia na metavym) — amal 9,4 tysiačy rubloŭ. Paśla zvalnieńnia chłopiec try miesiacy pracavaŭ u IT. Nie zmoh zatrymacca bolš praź niaspłačany doŭh — palityka kampanii patrabavała, kab jon spačatku zakryŭ pytańnie z adpracoŭkaj.
«Sprabavaŭ znajści pracu pa śpiecyjalnaści, u śfiery adukacyi. Źviartaŭsia ŭ niekalki roznych rajonaŭ, ale paŭsiul admaŭlajuć. U aktyŭnym pošuku pracy, ale pakul nie biaruć. U baćki na pčalniku padpracoŭvaŭ, ciapier siezon skončyŭsia»,
— kaža Alaksandr. Doŭh pierad univiersitetam jon u vyniku zakryŭ.
«U siońniašniuju škołu viartacca nie chaču»
Dyrektar maładziečanskaj škoły №5 Jaŭhien Makarevič syšoŭ jašče ŭ žniŭni 2020-ha. Jon byŭ staršynioj vybarčaj kamisii na ŭčastku №29, dzie pieramahła Śviatłana Cichanoŭskaja.
Šlach u dziaržustanovy, kaža były dyrektar, jamu ciapier zakryty.
«Znajšoŭ miesca ŭ śfiery adukacyi, pracuju ź dziećmi», — padzialiŭsia jon.
Z vybitnaj nastaŭnicaj chimii Natallaj Paščuk z Maładziečna nie praciahnuli kantrakt u kancy červienia. Jana vykładała ŭ škole №7, čatyry razy ŭznaharodžvałasia premijaj z prezidenckaha fondu, jaje vučni byli pieramožcami mižnarodnaj miendzielejeŭskaj alimpijady pa chimii. Ciapier Natalla Daniłaŭna na piensii.
Fota «Rehijanalnaj haziety»
«U siońniašniuju škołu viartacca nie chaču, navat kali b i zaprašali, — pryznajecca jana. — Na voli z čystym sumleńniem našmat pryjemniej. Ciapier zajmajusia repietytarstvam».
«Zajmajusia redahavańniem»
Historyja nastaŭnicy ź Biełaaziorska Taćciany Bryč uskałychnuła ŭvieś horad. U škole №3, dzie jana viała ruskuju movu i litaraturu, žančynu zatrymali naŭprost na ŭroku pad płač dziaciej. Try dni da suda pratrymali ŭ izalatary, a paśla dali štraf u 10 bazavych pa artykule 23.34 KaAP (ciapierašni 24.23). Vučni zładzili vialikuju akcyju salidarnaści sa svaim piedahoham — fatahrafavalisia z płakatami ŭ jaje padtrymku.
U krasaviku Taćcianu zvolnili pa artykule za «amaralny ŭčynak». U škołu jana nie viarnułasia.
«Pracuju pa dahavory padradu, zajmajusia redahavańniem u niedziaržaŭnych ustanovach», — kaža Taćciana.
Niaŭžo usich zvalniali?
Nie ŭsio historyi skončylisia zvalnieńniem. Naprykład, u 199-j škole Minska nastaŭniki, što zdymalisia ŭ roliku, praciahvajuć pracavać.
U Biarozaŭskim rajonie dyrektary škoł, jakich pazdymali z pasad, taksama zastalisia ŭ sistemie adukacyi. Ina Žukovič stała namieśnikam dyrektara ŭ haradskoj siaredniaj škole №2, Mikałaj Žukovič — namieśnikam dyrektara ŭ 1-j škole (raniej jon jaje ŭznačalvaŭ). Śviatłanu Karpovič pieraviali namieśnikam dyrektara Centra dadatkovaj adukacyi dziaciej i moładzi Biełaaziorska.
