U lidara Partyi BNF Ryhora Kastusiova — karanavirus
Advakatka Inesa Alenskaja nie zmahła sustrecca ź lidaram partyi BNF Ryhoram Kastusiovym, jaki ź viasny znachodzicca ŭ SIZA KDB. Napiaredadni jana sprabavała ŭbačyć svajho padabaronnaha, adnak joj admovili ŭ sustrečy, paviedamlaje BiełaPAN.
Advakatcy patłumačyli, što sustreča niemahčymaja, bo ŭ Kastusiova karanavirus. Adnak raniej, nahadvaje dačka palityka, im kazali, što, užo znachodziačysia ŭ SIZA, palityk atrymaŭ dźvie dozy vakcyny suprać COVID-19.
Dačka palityka Kaciaryna raspaviała pra apošni list baćki, jaki siamja atrymała 25 žniŭnia. U im jon piša, što pačuvajecca drenna. U siaredzinie lipienia ŭ jaho zapadozryli ankałahičnaje zachvorvańnie. U žniŭni narešcie zvazili na abśledavańnie, ale pra vyniki rodnym nie raspaviadajuć.
Raniej siamja «prasiła pravieści ŭsie nieabchodnyja abśledavańni i pryniać terminovyja miery pa lačeńni baćki». Ale im adkazali, što Kastusioŭ «atrymlivaje poŭny kurs lačeńnia, pryznačanaha ŭ adpaviednaści z rekamiendacyjami daktaroŭ-śpiecyjalistaŭ».
Ryhor Kastusioŭ byŭ zatrymany 12 krasavika. Jon razam z Alaksandram Fiadutam i jurystam z ZŠA Juryjem Ziankovičam staŭ fihurantam kryminalnaj spravy ab «zmovie z metaj zachopu ŭłady niekanstytucyjnym šlacham».
