Navukoŭcy: samki kalibry imitujuć źniešnaść samcoŭ dla abarony ad ich ahresii
Źniešnie kalibry — pryhožyja ptuški, ale nasamreč ich śviet napoŭnieny ahresijaj. Ciapier vučonyja zrazumieli, što niekatoryja z samak kalibry navučylisia jaje paźbiahać. U hetym ptuškam dapamahaje jarkaje apiareńnie — jakraz takoje, jak u samcoŭ.
Fota pixabay.com.
Daśledčyki z Kornelskaha ŭniviersiteta złavili ŭ Panamie bolš za 400 kalibry-jakabinaŭ, raźmiaścili na ich radyjomajački i ŭstalavali 28 karmušak z mahčymaściu vyznačyć, jakaja ptuška i kolki razoŭ ich naviedvała. Vyznačyłasia, što typovaje dla samcoŭ apiareńnie dazvalaje kalibry atrymlivać bolš ježy, a taksama dapamahaje samkam paźbiahać ahresii samcoŭ, u tym liku dziaŭbańnia i šturškoŭ, piša Guardian.
Vyśvietliłasia, što ŭ pačatku i samki, i samcy kalibry vyhladajuć adnolkava — jany majuć typovuju dla samcoŭ afarboŭku. Paźniej padčas stareńnia prykładna 20% samak zachoŭvajuć jarkaje apiareńnie, a ŭ astatnich koler robicca bolš ćmianym.
Raniej ekśpierty ličyli, što zachavańnie koleru źviazanaje z kankurencyjaj za samcoŭ, ale akazałasia, što samcy ptušak prajaŭlajuć bolš cikaŭnaści da ptušak z typovym dla samak apiareńniem. Tamu biołahi pryjšli da vysnovy, što imitavańnie afarboŭki samcoŭ źviazanaje z kankurencyjaj kalibry za ježu i ź ich pavodzinami ŭ zhurtavańniach.