Stała viadoma, chto sotniami tysiač skuplaje akcyi «Biełarusbanka», jakija mohuć davać sotni pracentaŭ prybytku
Raniej my paviedamlali pra dziŭnuju schiemu, kali dziaržava dała mahčymaść zarabić na akcyjach Biełarusbanka z prybytkovaściu 500% i bolš.
Cana na akcyi, jakija mohuć nabyć tolki supracoŭniki Biełarusbanka, ustanoŭlenaja bankam u 18 kapiejek.
Praz dva hady vałodańnia hetyja akcyi možna pradać šmatkroć daražej — tak, ciapier jany handlujucca pa 3,5-5 rubloŭ. Adroźnieńnie «prostych» akcyj ad pryvilejavanych u tym, što pa pieršych płaciać mizernyja dyvidendy — 1-2% u hod, ale za košt hetaj mizernaści pa «pryvilejavanych akcyjach» vypłačvajucca zvyšdyvidendy, tamu ich cana na rynku padskokvaje ŭ razy. Taki prybytak źjaŭlajecca całkam lehalnym i moža być adlustravany ŭ dekłaracyjach.
Schiema dziejničaje z 2019 hoda. Chto ž bieniefiecyjary?
Zhodna z zakonam, navat svoj namier nabyć akcyi treba zadekłaravać. My pravieryli na Adzinym partale finansavaha rynku proźviščy top-mieniedžmienta Biełarusbanka.
Vyjaviłasia zajmalnaja karcina: staršynia praŭleńnia i jaho namieśniki sotniami tysiač skuplajuć «prostyja akcyi», jakija ŭ nastupnym mohuć być kanviertavanyja ŭ «pryvilejavanyja» zhodna z rašeńniem schoda akcyjanieraŭ. Chto ŭvachodzić u schod akcyjanieraŭ dziaržaŭnaha banka? Pradstaŭniki dziaržavy, jakich jana delehuje.
I voś, naprykład, staršynia praŭleńnia banka Viktar Ananič vykazaŭ namier kupić 50 000 prostych akcyj u 2020 hodzie.
I jašče 40 000 u 2021 hodzie.
Pieršy namieśnik staršyni praŭleńnia Alaksandr Paliŭka ŭ 2020-m vykazaŭ žadańnie nabyć 120 000 prostych akcyj i jašče 150 000 u 2021-m.
Kali ŭziać canu pakupki i samuju minimalnuju canu prodažu na rynku pryvilejavanych akcyj (pry ŭmovie, što ich kanviertujuć), to z «inviestycyi» ŭ 48 600 rubloŭ namieśnik staršyni praŭleńnia praz dva hady atrymaje mahčymaść pradać akcyi za 945 000 rubloŭ.
Ź inšymi namieśnikami situacyja anałahičnaja: Dźmitryj Hryščankaŭ za dva hady vykazaŭ namier kupić 60 000 akcyj, Śviatłana Kaženkina 150 000, Siarhiej Mielnik 175 000.
Vyhladaje, siarod usich namieśnikaŭ staršyni praŭleńnia tolki Taćciana Michajłoŭskaja zastałasia biez akcyj, jana ŭ banku zajmajecca piersanałam. Taksama niama dadzienych pa akcyjach, jakija b naležali vykanaŭčamu dyrektaru Michaiłu Kuličkavu.
My paprasili prakamientavać infarmacyju finansavaha analityka Maksima Adaskieviča. Jon ličyć, što kolkaść akcyj, jakija choča nabyć top-mieniedžmient, vyhladaje padazronaj.
«Kali b heta była prahrama, kab dać zvyčajnym minarytaryjam i supracoŭnikam bonusnuju dachodnaść, takoj anamalnaj karciny b nie było.
Kali b taki atrakcyjon ščodraści pravodziŭsia biez udziełu praŭleńnia — heta była b krychu dziŭna strukturavanaja schiema, ale pa sutnaści jašče narmalnaja. A tak, viadoma, abjomy staviać pytańni pra matyvy.
Nakolki vialikaj budzie dachodnaść u vyniku — pytańnie, bo biudžet na dyvidendy abmiežavany 1% prybytku, adnak, znoŭ ža, heta možna źmianić.
Hałoŭnaja prablema, što dziaržava i ŭłaśnik, i kiraŭnik, i rehulatar, a tak nie pavinna być, heta i pryvodzić da takich situacyj», — reziumuje Adaskievič.
