«4691 sprava za ekstremizm». SK padsumavaŭ vyniki pracy ŭ 2021 — nas čakaje jašče šmat sudoŭ za palityku
SK padvioŭ vyniki pracy za 6 miesiacaŭ biahučaha hoda.
«Sa žniŭnia 2020 hoda asnoŭnyja namahańni Śledčaha kamiteta skancentravanyja na vyjaŭleńni, spynieńni i daśledavańni abstavinaŭ kryminalnych prajaŭ, spałučanych ź niezakonnymi masavymi mierapryjemstvami, biesparadkami, pratesnymi akcyjami, zamacham na dziaržaŭny suvierenitet i hramadskuju biaśpieku, naŭmysnym źniščeńniem i paškodžańniem majomaści, hvałtam i pahrozami ŭ dačynieńni da słužbovych asob i členaŭ ich siemjaŭ, — infarmuje SK. — Śledčymi padraździaleńniami ŭzbudžanaja 4691 kryminalnaja sprava pa 4196 faktach takich prajaŭ».
Bolšaść składajuć spravy pa art. 341 (apahanieńnie zbudavańniaŭ i psavańnie majomaści) i art. 369 (abraza pradstaŭnika ŭłady) Kryminalnaha kodeksa Respubliki Biełaruś.
U sud nakiravali pakul tolki 825 spraŭ. Vyhladaje, što nas čakaje jašče šmat sudoŭ pa palityčnych spravach. Pravaabaroncy, nahadajem, pryznali palitviaźniami pakul 597 čałaviek.
«Śledčy kamitet sumiesna z zacikaŭlenymi orhanami praciahnie vyjaŭleńnie i pryciahnieńnie da kryminalnaj adkaznaści radykałaŭ, ekstremistaŭ, tych, chto pasiahaŭ na suvierenitet i hramadskuju biaśpieku krainy, — adznačyŭ u zaklučnym słovie staršynia SK Dźmitryj Hara. — Adkaznaść takich asob niaŭchilnaja. Heta była i budzie pryncypovaja pazicyja Śledčaha kamiteta».
Nahadajem, što mienavita Hara — u 2020 hodzie namieśnik hienprakurora — uznačalvaŭ kamisiju, jakaja abiacała raśledavać fakty źbićcia ludziej siłavikami. U vyniku nie zaviali nivodnaj kryminalnaj spravy ni na kaho z pradstaŭnikoŭ siłavych viedamstvaŭ. Pra dziejnaść toj kamisii niama ŭvohule nijakaj infarmacyi. A sam Hara nieŭzabavie ŭznačaliŭ Śledčy Kamitet.
