Clubhouse hublaje aŭdytoryju i admaŭlajecca ad svaich fišak — što stała z sacsietkaj, jakaja narabiła šmat šumu
U lutym 2021 hoda ŭ internet uvarvaŭsia Clubhouse — sacyjalnaja sietka, dzie karystalniki kamunikujuć vyklučna hołasam, a nie z dapamohaj tekstaŭ. Aŭdytoryju začapiła toje, što, traplajučy ŭ «tematyčny pakoj», u žyvym efiry možna było pasłuchać viadomych miedyjnych pierson, u tym liku Marka Cukierbierha albo Iłana Maska. Prajekt pryciahnuŭ miljonnyja inviestycyi, jamu pradkazvali burny rost — na pačatku hoda biznes aceńvaŭsia ŭ $1 młrd. Što adbyvajecca ciapier? Piša Probusiness.io.
Fota Depositphotos.com
Na dniach suzasnavalniki sacsietki Poł Devisan i Rochan Set abviaścili, što Clubhouse admianiaje sistemu invajtaŭ, kali zarehistravacca ŭ dadatku možna tolki pa zaprašeńni ad užo isnujučaha karystalnika. Mienavita hetuju asablivaść nastojliva raschvalvali PR-ščyki, bo sistema invajtaŭ stvarała sacsietcy imidž elitarnaha kłuba, u jaki nie tak prosta patrapić.
Ciapier usio stała praściej, i voś jak heta kamientujuć stvaralniki sacsietki: «My zaŭsiody chacieli, kab Clubhouse byŭ adkrytym. Luby čałaviek u śviecie pavinien mieć dostup da źmiastoŭnych razmoŭ». Sa słoŭ ułaśnikaŭ, abmiežavańni patrebnyja byli na pieršym etapie, kab pašyrać sacsietku raŭnamierna, a ciapier prajekt budzie maštabiravacca.
Mabyć, z toj ža metaj za tydzień da hetaha ŭ Clubhouse było źniata abmiežavańnie na tekstavyja paviedamleńni. Źjaviłasia opcyja Backchannel — ubudavany miesiendžar dla pierapiski. Taki krok u ŚMI nazyvajuć «zdradaj samim sabie», bo mienavita kamunikacyja hołasam adroźnivała Clubhouse ad inšych sacyjalnych sietak i miesiendžaraŭ.
Ekśpierty miarkujuć, što źniaćcio abmiežavańniaŭ — sproba viarnuć papularnaść, jakaja była ŭ prajekta na pačatku hoda.
Nahadajem, u lutym 2021-ha Clubhouse pakazaŭ vybuchny rost aŭdytoryi. Kali ŭ kancy 2020 hoda ŭ sacsietcy byli zarehistravanyja kala 600 tysiač karystalnikaŭ, to ŭ lutym 2021 hoda ich było ŭžo 6 miljonaŭ.
Asablivuju rolu ŭ prasoŭvańni adyhrali miedyjnyja piersony. Čaho kaštavaŭ adzin tolki post zasnavalnika Tesla i SpaceX Iłana Maska, u jakim jon zaprasiŭ parazmaŭlać u Clubhouse aficyjny Kreml? Ludzi rynulisia spampoŭvać prykładańnie, kab atrymać raskošu znosin z topavymi mieniedžarami, biznesoŭcami, akciorami i h.d. Na dumku analitykaŭ, mienavita ŭ hetym była asnoŭnaja pryčyna papularnaści Clubhouse — stvarałasia iluzija «žyvoj razmovy» z zorkaj.
Ale paśla pikavaha lutaha cikavaść da Clubhouse stała zhasać. Zorki stali ŭsio mienš času pravodzić u raśpijaranaj sacsietcy, i masavaja papularnaść zastałasia ŭ minułym. Taksama ŭ sacsietki źjavilisia surjoznyja kankurenty — padobnyja hałasavyja pradukty zapuścili Facebook, Instagram, Twitter, Reddit, LinkedIn i inšyja viadomyja sacsietki.
Adbiłasia i toje, što stvaralniki prajekta zaciahnuli z raspracoŭkaj prykładańnia na Android. Jano stała dastupna tolki ŭ mai, choć čakali jaho ŭ sakaviku ci krasaviku. Viadoma, dziakujučy raspracoŭcy na Android červieńskaja statystyka zapampovak istotna ŭzrasła (pracuje adkładzieny popyt), ale viarnucca da ličbaŭ hetaj zimy ŭ prajekta pakul nie atrymlivajecca. Pa dadzienych na červień 2021 hoda, u sacsietcy kala 12 miljonaŭ aktyŭnych karystalnikaŭ, uklučajučy 10 miljonaŭ na iOS i 2 miljony na Android.
Jak na papularnaści Clubhouse adabjecca admiena zaprašeńniaŭ, skazać składana. Pa dadzienych The Verge, ciapier u liście čakańnia na rehistracyju znachodziacca 10 miljonaŭ čałaviek, heta značyć taki krok sapraŭdy moža pavialičyć aktyŭnaść i kolkaść karystalnikaŭ. Pry hetym viadučyja suśvietnyja vydańni ŭžo vypuścili materyjały z zahałoŭkami ab tym, što «sacsietka pamiraje» i kropka niezvarotu projdzienaja.
