«Nieprymalna». MZS Izraila asudziła vykazvańnie Łukašenki pra jaŭrejaŭ
Ministerstva zamiežnych spraŭ Izraila asudziła vykazvańnie Łukašenki, piša Jerusalem Post.
Havorka idzie pra vystup Łukašenki na mierapryjemstvie 3 lipienia miemaryjalnaha kompleksu «Kurhan Słavy». Jon, u pryvatnaści, zajaviŭ, što pačata rasśledavańnie złačynstvaŭ nacystaŭ u Biełarusi, kab dakazać «Chałakost biełaruskaha naroda»: «Jaŭrei ž zmahli heta dakazać. Uvieś śviet siońnia schilajecca pierad imi, navat bajacca palcam na ich pakazać».
Ministerstva zamiežnych spravaŭ Izraila zajaviła ŭ aŭtorak, što kamientary Łukašenki byli «nieprymalnymi».
Namieśnik hienieralnaha dyrektara adździeła Jeŭrazii i Zachodnich Bałkan Ministerstva zamiežnych spraŭ Izraila Hery Karen vyklikaŭ časovaha kiraŭnika pasolstva Biełarusi ŭ Izraili dla razmovy.
Padčas Chałakosta ŭ Biełarusi było zabita kala 800 000 jaŭrejaŭ (90% jaŭrejskaha nasielnictva). U toj čas jak u niekatorych inšych krainach miascovaje nasielnictva dapamahała nacystam zabivać miascovych jaŭrejaŭ, biełarusy hetaha nie rabili, adznačaje izrailskaje vydańnie, i niekatoryja hrupy navat dapamahali abaraniać jaŭrejaŭ.
Heta nie pieršy vypadak, kali biełaruskaha palityka padazrajuć u antysiemickich vykazvańniach.
U 2015 hodzie Łukašenka raskrytykavaŭ Siamiona Šapiru, tahačasnaha hubiernatara Minskaj vobłaści, za toje, što jon nie ŭziaŭ biełaruskich jaŭrejaŭ «pad kantrol».
«Ja vas prasiŭ hod tamu, daručyŭ usich jaŭrejaŭ uziać pad kantrol u Biełarusi. I navat Pavieł Izotavič nie aburaŭsia, a Zisier nijak nie moža. Nijak nie možaš ty hetaha čałavieka narmalizavać. Pahladzi ŭvažliva», — skazaŭ Łukašenka, źviartajučysia da kiraŭnika Minskaj vobłaści Siamiona Šapiry.
U 2007 hodzie MZS Izraila acharaktaryzavała vykazvańni Łukašenki pra staŭleńnie jaŭrejaŭ da pryrody abraźlivymi i antysiemickimi. Pasoł Biełarusi ŭ Izraili byŭ vyklikany ŭ MZS dla tłumačeńniaŭ.
Skandał zdaryŭsia paśla taho, jak padčas pres-kanfierencyi na radyjo palityk skazaŭ: «Kali vy byli ŭ Babrujsku, vy bačyli, u jakim stanie horad? Strašna było zajści, śvinušnik byŭ. Heta ŭ asnoŭnym jaŭrejski byŭ horad, vy viedajecie, jak jaŭrei staviacca da miesca, dzie jany žyvuć. Pahladzicie ŭ Izraili, ja voś byŭ…»
