U hipiermarkietach pradajuć biełaruski ekspres-test na antycieły da karanavirusa. Što jon pakaža?
Košt adnaho — kala 18 rubloŭ.
Fota blizko.by
Pryncyp dziejańnia testu nastupny: biarecca kropla kryvi z palca i pipietkaj pieranosicca na testavuju kasietu. Paśla tudy dadajecca rastvor z prabirki. Vynik hatovy praz 15 chvilin. Test pakazvaje dva vidy antyciełaŭ — M (zvyčajna śviedčać pra vostruju fazu chvaroby) i G (pakazvajuć, ci vypracavaŭsia imunitet da kavidu).
Test vypuściła haspadarča-raźlikovaje vopytnaje pradpryjemstva Instytuta bijaarhaničnaj chimii Akademii navuk. Raspracoŭvać jaho pačali jašče viasnoj minułaha hoda.
«Jon zrobleny na nukleakapsidny antyhien, jaki ŭnutry RNK-virusa. Jak praviła, kali hety białok razburajecca, antyciełaŭ da jaho vypracoŭvajecca dastatkova šmat. Tamu test pracuje jak hadzińnik, — kaža kiraŭnica adździeła techničnaha kantrolu Natalla Mielakova. — Test nie pakazvaje kolkaść antyciełaŭ — tolki ich najaŭnaść. Ale intensiŭnaść afarboŭvańnia maje značeńnie. Kali my bačym jarkuju pałasu, značyć antyciełaŭ šmat, kali blednuju — to ich mała».
Na vytvorčaści adznačajuć: kali vy tolki ŭčora zachvareli i chočacie zrazumieć, ci heta karanavirus, to treba rabić PŁR-mazok.
A ekspres-test padychodzić dla taho, kab ubačyć, ci zastalisia antycieły paśla chvaroby, abo ŭpeŭnicca, što heta byŭ kavid.
«Imunahłabuliny M pačynajuć vypracoŭvacca z 3-5 dnia zachvorvańnia, u vialikaj kolkaści ich stanovicca prykładna na 12-14 dzień, — tłumačyć ekśpiert, čamu ŭ pieršyja dni chvaroby taki test moža być nieinfarmatyŭnym. — U adnoj z paliklinik rabili ŭsim na piaty dzień padobnyja testy (tolki nie našy, a kitajskija ci karejskija). A jany ničoha nie pakazvali. Heta nie značyć, što testy drennyja — prosta antyciełaŭ jašče nie było».
Imunahłabuliny M mohuć zachoŭvacca da 12 tydniaŭ. Tamu, kab zrazumieć, ci śviedčać jany pra ciapierašniaje zachvorvańnie abo pra pieraniesienaje niadaŭna, treba supastaŭlać vyniki testu ź simptomami. Kali vy pieranieśli karanavirus dva miesiacy tamu, vierahodniej, heta antycieły z taho razu.
«Ekspres-test možna paŭtaryć praz try ci šeść miesiacaŭ, kab zrabić vysnovu, ci rabić pryščepku albo antycieł jašče chapaje. I naohuł zrazumieć, ci dała imunnaja sistema adkaz paśla chvaroby», — dzielicca Natalla Mielakova.
