Akademik Bialecki, jakoha niadaŭna vyzvalili, viarnuŭsia ŭ miedycynu. Viadzie pryjom u zvyčajnaj paliklinicy
U červieni byŭ pamiłavany i vyzvaleny adzin z najlepšych biełaruskich daktaroŭ Alaksandr Bialecki. Jon byŭ asudžany za karupcyju. Jak stała viadoma Tut.by, doktar viarnuŭsia ŭ miedycynu. Ciapier jon viadzie pryjom u zvyčajnaj paliklinicy Minskaha rajona, jakaja znachodzicca ŭ Baraŭlanach. Zapisacca na płatny pryjom da znakamitaha lekara moža luby achvotny.
U lutym 2019 hoda akademika pryznali vinavatym i prysudzili da 7,5 hoda pazbaŭleńnia voli. Alaksandr Bialecki ŭznačalvaŭ RNPC traŭmatałohii i artapiedyi. Na sudach akademik nie admaŭlaŭ, što ŭ jakaści padarunka atrymaŭ 4 tysiačy jeŭra i 3 tysiačy dalaraŭ. Pry hetym jon nie ŭsprymaŭ hetyja hrošy jak chabar. A adnu z sum vydatkavaŭ na pajezdku na kanhres u Barsiełonu, dzie ŭ skład biełaruskaj delehacyi ŭvachodziła 12 čałaviek.
Bialecki kazaŭ, što raskajvajecca ŭ zroblenym. Bujnyja ž sumy, jakija byli znojdzieny ŭ jaho doma i na ŭkładach, pa jaho słovach, jamu davali zamožnyja siabry, i heta nie było źviazana ź jaho prafiesijnaj dziejnaściu. Adzin z takich siabroŭ — biznesmien Alaksandr Šakucin. Hetyja sumy nie byli pryznanyja złačynnymi.
Pakarańnie viadomy doktar adbyvaŭ u kałonii «Vićba», kudy časta adpraŭlajuć asudžanych za karupcyju čynoŭnikaŭ, sudździaŭ, siłavikoŭ i biznesoŭcaŭ.
Razam ź Bialeckim u červieni byŭ pamiłavany i vyzvaleny były namieśnik ministra achovy zdaroŭja Ihar Łasicki, jon prachodziŭ pa hučnaj «spravie daktaroŭ» ab karupcyi.
Alaksandr Bialecki — unikalny ŭ svajoj halinie doktar. U jaho bolš za 450 drukavanych rabot, u tym liku 16 manahrafij, ź ich vosiem vydadzienyja za miažoj. Za svajo prafiesijnaje žyćcio jon padrychtavaŭ čatyroch daktaroŭ i šeść kandydataŭ miedycynskich navuk.
Pakul Alaksandr Bialecki znachodziŭsia ŭ SIZA, jaho ŭznaharodzili miedalom Akademii navuk. Jon vyras u siamji lekaraŭ i ŭsio žyćcio byŭ dziciačym artapiedam. Pravioŭ 4 tysiačy składanych vysokatechnałahičnych apieracyj. Akramia hetaha, u jaho 92 patenty ŭ lačeńni dziaciej z patałohijami tazaściehnavych sustavaŭ, u 2010-m hodzie jon atrymaŭ zvańnie «Zasłužany dziejač navuki», čytaŭ lekcyi ŭ mnohich krainach śvietu, vystupaŭ na Amierykanskaj asacyjacyi apierujučych chirurhaŭ. Mienavita jon raspracavaŭ novyja technałohii chirurhičnaha lačeńnia artapiedyčnaj patałohii tazaściehnavaha sustava ŭ dziaciej i padletkaŭ. Za heta jaho ŭznaharodzili Dziaržpremijaj u halinie navuki i techniki. Kiravaŭ pracaj pa stvareńni biełaruskich impłantaŭ i mietałakanstrukcyj u traŭmatałohii i artapiedyi.
