Źjechaŭ z Ukrainy ŭ pačatku vajny, hulaje ŭ Hvardyjoły, žanaty sa spartovaj žurnalistkaj. Što my viedajem pra Alaksandra Zinčanku
Hieroj hulni sa Šviecyjaj.
Fota Getty Images
Ukraina — u čverćfinale futbolnaha čempijanatu Jeŭropy! U historyi našych susiedziaŭ takoje zdarajecca ŭpieršyniu. Bilet u nastupnuju stadyju turniru ŭkraincy zavajoŭvali ŭviečary 29 červienia ŭ ciažkaj hulni z kamandaj Šviecyi. Kančatkovy lik matča pa vynikach ažno 120 chvilin hulni — 2:1 na karyść ukraincaŭ.
Hałoŭnaja zorka hulni — Alaksandr Zinčanka. Na 27-j chvilinie matča hety paŭabaronca anhlijskaha «Mančester Sici», jaki ŭ minułych hulniach čempijanatu nie byŭ asabliva zaŭvažny, mocnym udaram adkryŭ lik. Na 43-j chvilinie šviedy dziakujučy hołu paŭabaroncy Emila Forśbierha vyraŭniali lik.
Spatrebiŭsia dadatkovy čas, kab vyznačyć pieramožcu. Naprykancy jaho, ažno na 121-j chvilinie hulni, dziakujučy pasu Zinčanki svoj pieršy hoł za zbornuju zabiŭ ukrainski napadajučy Arciom Doŭbik. Cikava, što za paru miesiacaŭ da startu Jeŭra hałoŭny trenier ukraincaŭ Andrej Šaŭčenka raspaviadaŭ, što Doŭbik nie hatovy da hulni za zbornuju: jon nie zabivaŭ hały navat u tavaryskich hulniach.
Asnoŭnyja padziei hulni Šviecyja — Ukraina.
Ale ž, biezumoŭna, topavy z učarašnich ukrainskich hierojaŭ — Alaksandr Zinčanka, 24-hadovy paŭabaronca anhlijskaha «Mančester Sici». Hety chłopiec rodam ź nievialikaha haradka Radamyšl u Žytomirskaj vobłaści, na siońnia jaho nasielnictva naličvaje 14 tysiač čałaviek. Svoj futbolny šlach Zinčanka pačynaŭ u miascovaj spartovaj škole, u składzie jakoj braŭ pryzy na ŭkrainskich spabornictvach.
Pieršy vialiki kłub u karjery Alaksandra — daniecki «Šachcior», jakomu chłopiec naležaŭ z 2010 pa 2014 hady. A potym Zina, jak jaho nazyvajuć fanaty, syšoŭ z kłuba praź nieparazumieńnie z kiraŭnictvam. Alaksandr narakaŭ na toje, što nie bačyŭ dla siabie mahčymaści traplać u asnoŭny skład kamandy, kiraŭnictva ž «Šachciora» śćviardžała, što chłopca pieramanili rasijskija futbolnyja ahienty. Jašče adnoj pryčynaj dla sychodu Zinčanki byli bajavyja dziejańni na Danbasie — chłopiec, jaki na toj čas jašče byŭ niepaŭnaletnim, źjechaŭ u Rasiju razam z rodnymi.
Niekalki miesiacaŭ Alaksandr nie moh znajści sabie prafiesijny kłub i hulaŭ u adnoj z maskoŭskich amatarskich lih. U pačatku 2015-ha hulec pierabraŭsia ŭ rasijskuju «Ufu», a letam 2016 padpisaŭ kantrakt na piać hod z anhlijskim «Mančester Sici». Spačatku chłopca adsyłali ŭ arendu ŭ niderłandski «PSV», ale ź ciaham času jon zamacavaŭsia ŭ asnoŭnym składzie anhlijskaj kamandy, dzie hulaje pad kiraŭnictvam zornaha treniera Pepa Hvardyjoły.
Zinčanka taksama viadomy praz svaju historyju kachańnia. Jaho vybrańnica, viadomaja pad psieŭdanimam Ułada Siadan, nabyła viadomaść letam 2016 hoda, kali zbornaja Ukrainy vystupała na minułym čempijanacie Jeŭropy ŭ Francyi. Žurnalisty prosta zaŭvažyli na trybunach francuzskich stadyjonaŭ pryhožuju dziaŭčynu ŭ adzieńni koleraŭ ukrainskaha ściaha, i jaje foty nabyli viadomaść u Siecivie.
Paźniej Uładzie prapanavali pracu spartovaj žurnalistki na ŭkrainskich kanałach. A ŭ 2019 hodzie pra dziaŭčynu znoŭ pačali pisać u presie, i hetaja chvala viadomaści jakraz była źviazanaja z Alaksandram Zinčankam. Tady skončyłasia pieramožnaja dla Ukrainy hulnia sa zbornaj Sierbii, i futbalist davaŭ paślamatčavy kamientar dla Ułady — ale nie strymaŭsia i pacałavaŭ dziaŭčynu.
Tak žurnalistam stała viadoma pra ich znajomstva, jakoje ź pierarasło ŭ ramantyčnyja adnosiny. Ź ciaham času Ułada pierabrałasia da kachanaha ŭ Mančester, a ŭ minułym hodzie jany pabralisia šlubam, para čakaje dzicia.
Fota: Instagram Ułady Zinčanka.
Jašče adna cikavostka pra Zinčanku — jaho padabienstva da inšaha hulca «Mančester Sici», bielhijca Kievina de Brejne. U raździavalni kamandy žartujuć pra toje, što dvuch futbalistaŭ nibyta ciažka adroźnić adzin ad adnaho. Kievin i Alaksandr i sami časam abmieńvajucca žartami i trolać adzin adnaho — tak, niekalki hod tamu de Brejne krytykavaŭ praz kłubnuju pres-słužbu styl adzieńnia Zinčanki. Ale ž, kali stała viadoma pra toje, što Zinčanka chutka stanie baćkam, bielhijec nie zabyŭ jaho pavinšavać — napisaŭ na staroncy adnakłubnika ŭ sacsietcy zabaŭnaje «Małajčynka, synok».
