U centry Minska źjaviŭsia pomnik Skarynu — užo piaty ŭ horadzie FOTA
Kala Akademii navuk źjaviŭsia pomnik Francysku Skarynu. Heta častka kampazicyi «Załatoje koła biełaruskaj navuki».
Ideja dobraŭparadkavać terytoryju akademičnaha haradka źjaviłasia jašče ŭ 2015-m.
Płanavałasia, što ad aharodžy da Centralnaj navukovaj biblijateki (znachodzicca pobač z hałoŭnym budynkam Akademii navuk) budzie iści Aleja słavy biełaruskaj navuki, uzdoŭž jakoj buduć stajać biusty viadomych navukoŭcaŭ. U centry alei źjavicca bronzavaja kampazicyja «Załatoje koła biełaruskaj navuki», na jakoj raźmieściać fihury Francyska Skaryny, Kiryły Turaŭskaha, Simiaona Połackaha i inšych.
U płan mierapryjemstvaŭ Akademii navuk hetaja ideja trapiła tolki ŭ 2017-m. Prajekt raspracavała architekturna-inavacyjnaje biuro BNTU pad kiraŭnictvam Armiena Sardarava — dekana architekturnaha fakulteta hetaj VNU.
Sardaraŭ i architektar Taćciana Bašarymava tak abhruntavali svajo rašeńnie:
skvier, što isnuje kala biblijateki, «nie maje zavieršanaha i vyražanaha płanirovačnaha vyrašeńnia i ŭjaŭlaje saboj prosta zialony masiŭ z prakładzienymi ściežkami, jakija majuć hałoŭnym čynam tranzitny charaktar».
Na zdymku nižej možna ŭbačyć, jakim aŭtary bačać vyhlad skviera.
Fota: bntu.by
Na hety momant u skviery ŭstalavana altanka-ratonda — «Załatoje koła biełaruskaj navuki». U hetym kole raźmieščany pomnik Skarynu.
Heta nie pieršy krok pa ŭparadkavańni terytoryi. Niekalki hadoŭ tamu, u 2018-m, pierad budynkam Prezidyuma NAN adkryli skulpturnuju kampazicyju «Pierajemnaść biełaruskaj navuki» (aŭtary — skulptary Alena Charabieruš i Leanard Pakulnicki, architektar Armien Sardaraŭ).
Cikava, što pomnik Skarynu — užo piaty ŭ Minsku.
Pieršy źjaviŭsia va ŭnutranym dvoryku BDU, druhi — la budynka Nacyjanalnaj biblijateki.
U 1990-ja jaho płanavali ŭstalavać pobač z Akademijaj navuk, ale tahačasnaje kiraŭnictva ŭstanovy admoviłasia. Maŭlaŭ, pomnik budzie psavać ahulny vyhlad.
Treci znachodzicca la BDEU. Aficyjna jon pryśviečany viedam, ale aŭtar pakłaŭ u asnovu mienavita Skarynu. Čaćviorty ŭstalavany ŭ parku Janki Kupały.
