«Praz 10 chvilin paśla pačatku pryjšli siłaviki». Što adbyłosia na śpiektakli z udziełam Zareckaj
Siabra asnoŭnaha składu Kaardynacyjnaj rady Aksana Zareckaja była zatrymanaja ŭčora razam ź inšymi hledačami pastanoŭki «Bieły trus, Čyrvony trus». Unačy ich vypuścili. Raskazvajem, što viadoma.
Aksana Zareckaja
«Bieły trus, Čyrvony trus» — heta pjesa, raźličanaja na adnaho akciora. Jaje napisaŭ iranski dramaturh Nasim Salejmanpur, jaki admoviŭsia pajści ŭ vojska. Za heta jamu zabaranili vyjazdžać za miežy krainy. U 2010-m jon napisaŭ pjesu i takim čynam staŭ hramadzianinam suśvietu: jaho tvor pierakłali bolš, čym na 25 movaŭ i pastavili ŭ 49 krainach śvietu.
Biełaruś musiła stać 50-j. Za ažyćciaŭleńnie ŭziałasia niezaležnaja kampanija HomoCosmos.
Zhodna ź idejaj dramaturha, novy vykanaŭca nie maje nijakaha ŭjaŭleńnia, što jamu ci joj treba hrać. Tekst pjesy ŭ zakrytym kanviercie čakaje hieroja na scenie.
U Biełarusi śpiektakl płanavali pakazvać z tryma roznymi vykanaŭcami: Aksanaj Zareckaj, Dzianisam Dudzinskim i Alaksandram Ždanovičam.
Premjeru pryznačyli na luty 2021-ha, ale potym uvieś čas pieranosili — na sakavik, krasavik, maj. U adnym vypadku admaŭlała placoŭka, u druhim śpiektaklu anulavali hastrolnaje paśviedčańnie pa «epidemijałahičnych pryčynach»…
U vyniku, jak stała viadoma «Našaj Nivie», byŭ zrobleny videazapis hetaha śpiektakla z udziełam Aksany Zareckaj. Učora jana pajšła pahladzieć na ŭłasnuju ihru z ekrana. Heta byŭ jaje debiut jak aktrysy.
Jak raskazaŭ «NN» adzin z hledačoŭ,
jany źbiralisia adpačyć, pryjšli z šampanskim. Ale praz 10 chvilin paśla pačatku pryjšli siłaviki i zatrymali 10 hledačoŭ.
Jakuju strukturu jany pradstaŭlali (KDB, HUBAZiK abo niejkuju inšuju), nie patłumačyli.
«Pavodzili siabie karektna. Tvaram u padłohu nie kłali. Dy i niazručna panienak na špilkach tvaram u padołhu».
Usich zatrymanych advieźli ŭ Centralnaje RUUS i źjechali. Tam usio išło vielmi pavolna. Da nočy adpuścili čatyroch ludziej, u jakich jość niepaŭnaletnija dzieci. Astatnich zatrymali da suda. Zabrali abstalavańnie i telefony.
Jak kaža znajomy Zareckaj, u pratakole śćviardžajecca, što jana — trenier pa etykiecie — łajałasia, biłasia, irvała na milicyjancie vopratku i ŭpirałasia nahami. Pa jaho słovach, takoje abvinavačvańnie vystavili i astatnim zatrymanym.
