Navukoviec raskazaŭ, kali ludzi dabiarucca da inšych zorak
Mižzornyja paloty stanuć dastupnyja nie raniej čym praz 250-300 hadoŭ, raspavioŭ u intervju «RIA Novosti» viadučy navukovy supracoŭnik Łabaratoryi reaktyŭnaha ruchu NASA Viačasłaŭ Turyšaŭ, jaki braŭ udzieł u blizu 40 misijach NASA.
«Vykažam zdahadku, praz paru hadoŭ my z vami adkryvajem hazietu, dzie na pieršaj pałasie vielizarnym šryftam nadrukavana: «Za 100 śvietłavych hadoŭ ad nas znajšli płanietu, na jakoj paćvierdžanaja najaŭnaść arhaničnaha žyćcia»… Paloty na takija adlehłaści nam nie buduć dastupnyja jašče minimum 250-300 hadoŭ», — skazaŭ jon.
Takim čynam, vyvučyć płanietu ŭ inšaj zornaj sistemie z dapamohaj zonda nie ŭjaŭlajecca mahčymym, a dla taho, kab jaje razhladzieŭ teleskop, jon pavinien mieć kałasalnyja pamiery. Tak, kab atrymać malunak hetaha abjekta pamieram navat u adzin piksiel, spatrebicca aptyčny teleskop dyjamietram u 90 kiłamietraŭ. Ciapier dla pošuku ekzapłaniet vykarystoŭvajucca niepramyja mietady vyjaŭleńnia. Jany śviedčać pra najaŭnaść płaniet, ale nie dazvalajuć bačyć płaniety vizualna.
Kab ubačyć dalokija płaniety, Turyšaŭ prapanuje vykarystoŭvać Sonca ŭ jakaści linzy.
«Nie ŭdajučysia ŭ detali, skažu, ciaham 9 miesiacaŭ 1-mietrovy teleskop dazvolić nam ubačyć ekza-Ziamlu, jakaja znachodzicca za 100 śvietłavych hadoŭ ad nas z dakładnaściu 20-25 kiłamietraŭ na jaje pavierchni», — paviedamiŭ jon.
