Žoncy Tarajkoŭskaha sabrali na kartku bolš za 90 tysiač. Ciapier patrabujuć padatak
Udavie zahinułaha 10 žniŭnia kala stancyi mietro «Puškinskaja» Alaksandra Tarajkoŭskaha padatkovaja vystaviła rachunak na 11 tysiač rubloŭ, piša «Salidarnaść».
Padatkovaja inśpiekcyja Maskoŭskaha rajona Minska paličyła, što dabračynnaja i biazvypłatnaja dapamoha nieabyjakavych siamji zahinułaha 10 žniŭnia 34-hadovaha Alaksandra Tarajkoŭskaha źjaŭlajecca asabistym prybytkam jahonaj žonki za 2020 hod.
Padachodny padatak skłaŭ 11001,63 biełaruskich rubloŭ (u ekvivalencie kala $4 435). Hetuju sumu Alena Hierman pavinna była zapłacić da 1 červienia. Z hetaha dnia štodnia naličvajecca pienia.
Miarkujučy pa sumie padatku (11 tysiač rubloŭ) na kartku Alenie sabrali bolš za 90 tysiač rubloŭ.
Alena Hierman — udava Alaksandra Tarajkoŭskaha. Ich šlub nie byŭ zarehistravany aficyjna. Jany žyli jak siamja i razam hadavali dziaciej — Darju, starejšuju dačku Aleny ad pieršaha šlubu, i ahulnuju dačku Naściu.
Alena ličyć niespraviadlivym płacić padatak z dapamohi, jakuju akazali nieabyjakavyja ludzi.
— Ja bačyła razdrukoŭku rachunku: kožny pieraličvaŭ kolki moh, chto pa piać rubloŭ … ludzi zarabili hetyja hrošy, nichto im nie daŭ prosta tak.
Alena padrychtavała zvarot u Minharvykankam i Minski haradski Saviet deputataŭ z prośbaj vyzvalić jaje ad vypłaty padachodnaha padatku, pakolki heta pahoršyć materyjalny stan jaje siamji. U zvarocie ŭdava Alaksandra Tarajkoŭskaha taksama spasyłajecca na toje, što ŭ suviazi z admovaj va ŭzbudžeńni kryminalnaj spravy suprać supracoŭnikaŭ milicyi, jakija zabili jaje muža, jana nie moža pradjavić im hramadzianski pazoŭ ab kampiensacyi škody ŭ suviazi sa strataj karmiciela.
