«Publična vykrykvaŭ łozunhi i rabiŭ hučnyja vopleski rukami»: Ivanu Bahdzieviču prosiać dva hady kałonii
Sud Pieršamajskaha rajona Minska praciahnuŭ razhladać spravu palitviaźnia Ivana Bahdzieviča. Jaho abvinavačvajuć pavodle č. 1 art. 342 Kryminalnaha kodeksa. Pamočnica prakurora Ina Zubko zaprasiła jamu dva hady pazbaŭleńnia voli ŭ kałonii ahulnaha režymu.
Spravu razhladaje sudździa Siarhiej. Abaronca — Ahiejeŭ, paviedamlaje spring96.org.
Ivana Bahdzieviča abvinavačvajuć u tym, što 12-13, 13-14, 14-15, 16, 23 žniŭnia, znachodziačysia ŭ roznych kropkach Minska, jon «publična vykrykvaŭ łozunhi i rabiŭ hučnyja vopleski rukami, tym samym ździajśniaŭ dziejańni, nakiravanyja na praciahłaje parušeńnie spakoju hramadzian». Jany byli spałučanyja ź niepadparadkavańniem zakonnym patrabavańniam pradstaŭnikoŭ ułady. Svaimi dziejańniami jon «abmiežavaŭ prava dobraprystojnych hramadzian na spakoj, pracu i inšaje».
Ivan Bahdzievič pahadziŭsia dać pakazańni ŭ advolnaj formie, nadalej admoviŭsia śviedčyć pavodle 27 artykuła Kanstytucyi RB. Jon całkam nie pryznaje vinu. Adznačaje, što nie źjaŭlajecca ni administrataram, ni aktyŭnym udzielnikam čataŭ, u jakich čytaŭ naviny. Ivan raspavioŭ, što ŭdzielničaje ŭ dziejnaści pošukavaha vyratavalnaha atrada «Anioł»: jahonaja dziejnaść nie maje palityčnaj nakiravanaści.
Na pasiadžeńni 10 červienia dvoje śviedak nie źjavilisia ŭ sud praz stan zdaroŭja, byli začytanyja ich pakazańni na papiarednim śledstvie.
Pieršy śviedka raspavioŭ, što ŭ daty, paznačanyja ŭ abvinavačańni, Bahdzievič byŭ doma sa svajoj siamjoj i nie ŭdzielničaŭ u masavych mierapryjemstvach. Druhi śviedka raskazaŭ, što jany nasamreč stelefanoŭvalisia z Bahdzievičam, adnak nie ŭdzielničali ŭ mierapryjemstvach razam, jamu taksama nieviadoma, ci ŭdzielničaŭ u ich palitviazień.
Siarod materyjałaŭ spravy — pratakoły dopytaŭ, pastanovy, raparty, bilinh telefona Bahdzieviča (telefon pryznali rečavym dokazam), skrynšoty z sacyjalnych sietak. Da spravy dałučanyja charaktarystyki z apošniaha miesca pracy i PVA «Anioł».
Na pasiadžeńni 15 červienia zasłuchali telefonnyja razmovy Bahdzieviča, a taksama prajšli sprečki bakoŭ.
Prakuror paprasiła pryznać Bahdzieivča vinavatym pavodle č. 1 art. 342 Kryminalnaha kodeksa i pryznačyć jamu pakarieńnie — dva hady pazbaŭleńnia voli ŭ kałonii ahulnaha režymu.
U jakaści źmiakčalnych abstavinaŭ jana paprasiła ŭličyć najaŭnaść u abvinavačanaha dziaciej, u jakaści abciažarvalnych — niaźniatuju sudzimaść, a taksama toje, što Bahdzievič nie pracavaŭ i pryciahvaŭsia da administracyjnaj i kryminalnaj adkaznaści.
Advakat padkreśliŭ, što Bahdzievič nie pryznaje svaju vinu ŭ poŭnym abjomie. Jon nie admaŭlaje fakt znachodžańnia ŭ Miensku, tamu što byŭ vałancioram u pošukavym atradzie i sustrakaŭsia ŭ horadzie sa znajomymi. Kali pieršapačatkova Bahdzievič byŭ zatrymany pavodle art. 293 KK, jon pravioŭ u SIZA šeść miesiacaŭ: za hety čas nie było pradjaŭlena nivodnaha pramoha dokazu — fota, videa, abvinavačańnie hruntavałasia vyklučna na razmovach pa telefonie. Taksama ni adzin śviedka nie pakazaŭ, što jon plaskaŭ u dałoni abo vykrykvaŭ łozunhi, tamu za asnovu abvinavačańnia ŭziali hieałakacyju i prasłuchoŭku. Advakat upeŭnieny, što vina Bahdzieviča niedakazanaja, čałaviek nie pavinien być asudžany na asnovie zdahadak.
Prysud budzie abvieščany 23 červienia.
