Litva — pihmiej? Paraŭnoŭvajem VUP Litvy i Biełarusi
Ministr zamiežnych spraŭ Biełarusi nazvaŭ Litvu «pihmiejem». Adnak ekanamičnaja statystyka śviedčyć, što 3-miljonnaja Litva ŭžo abahnała 9-miljonnuju Biełaruś pa pamiery ekanomiki.
Vilnia, panarama horada. Wikimedia Commons.
U 1990-ja Biełaruś, Litva i Polšča vyjšli z adnoj sistemy. Starejšyja pamiatajuć, što ŭ saviecki čas Biełaruś i Litva zmahalisia ŭ «sacyjalistyčnym spabornictvie» pa ekanamičnych pakazčykach. Nadoi małaka na karovu byli bolšyja ŭ litoŭcaŭ, a jajkanosnaść kurej — u biełarusaŭ.
Čverć stahodździa tamu krainy vybrali roznyja palityčnyja i ekanamičnyja kursy. «Vy chočacie, kab było jak u Litvie?» — hetaje rytaryčnaje pytańnie časta sustrakałasia ŭ biełaruskaj dziaržaŭnaj prapahandzie 25 hadoŭ nazad.
Što majem ciapier?
Voś pakazčyki vałavoha ŭnutranaha praduktu pa stanie na 2021 hod (u dalarach, źviestki MVF): pamier ekanomiki Litvy bolšy, čym u Biełarusi.
Pryčym tendencyja nie na našu karyść — i heta jašče da ŭsiakich sankcyj. U 2019 hodzie Biełaruś Litvu jašče abhaniała.
Heta prytym što ŭ Litvie 2,8 miljona žycharoŭ, a ŭ Biełarusi — 9,4 miljona. Vałavy nacyjanalny pradukt na dušu nasielnictva ŭ Biełarusi ŭžo amal u 3,5 razu mienšy, čym u Litvie — kala 6500 i kala 22 000 USD adpaviedna. Vializny razryŭ i pa pamiery zarobkaŭ dy piensij «prostych ludziej». Kali pieraličyć VUP ci zarobki pa parytecie kupčaj zdolnaści, razryŭ robicca mienšy, ale ŭsio roŭna roźnica ŭ 2 razy (40 700 i 20 500 USD).
Litvu, viadoma, možna ličyć pihmiejem. Tolki tady treba pryznać, što Biełaruś pa abjomie svajoj ekanomiki, a značyć i pa svaich mahčymaściach, jašče mienšaja.
