Palitviaźnia Viačasłava Papova asudzili na try hady chimii za ŭdzieł u žnivieńskich akcyjach pratestu
U sudzie Leninskaha rajona razhledžanaja kryminalnaja sprava ŭ dačynieńni da Viačasłava Papova, jakoha abvinavačvali ŭ aktyŭnym udziele ŭ hrupavych dziejańniach, jakija hruba parušajuć hramadski paradak (č. 1 art. 342 KK) pa padziejach 9-10 i 30 žniŭnia, a taksama 27 vieraśnia. Spravu viała sudździa Julija Šut, bok dziaržabvinavačańnia pradstaŭlaŭ Maryja Malikava, pišuć pravaabaroncy.
Pavodle abvinavačańnia, Viačasłaŭ Papoŭ uziaŭ aktyŭny ŭdzieł u niesankcyjanavanych masavych mierapryjemstvach, dziejničaŭ sumiesna ź nieviadomaj hrupaj asob u Minsku ŭ pieryjad času z 22.00 hadzin 9 žniŭnia pa 01.11 hadzin 10 žniŭnia, z 14.30 da 17.04 hadzin 30 žniŭnia i z 15.46 da 17.46 27 vieraśnia 2020 hoda: znachodziŭsia na prajeznaj častcy daroh, pierakryvaŭ šlach ruchu transpartu, parušaŭ hramadski paradak i pravy hramadzian na spakojnuju pracu i adpačynak, vykrykvaŭ łozunhi, a 9 žniŭnia — i abraźlivyja słovy ŭ adras supracoŭnikaŭ pravaachoŭnych orhanaŭ. 27 vieraśnia siarod inšaha — nakleiŭ stykier na śviatłafor i vykrykvaŭ łozunh «Žyvie Biełaruś». Svaimi dziejańniami ździejśniŭ złačynstva pa č. 1 art. 342 Kryminalnaha kodeksa.
Siońnia ž sudździa Julija Šut abviaściła prysud pa spravie:
Viačasłava Papova pryznać vinavatym u aktyŭnych dziejańniach, jakija hruba parušajuć hramadski paradak, spałučanych ź vidavočnym niepadparadkavańniem zakonnym patrabavańniam pradstaŭnikam ułady, što pryviali da parušeńnia pracy transpartu i pradpryjemstvaŭ, i na padstavie č. 1 art. 342 KK pryznačyć jamu pakarańnie ŭ vyhladzie abmiežavańnia voli z nakiravańniem u papraŭčuju ŭstanovu adkrytaha typu na termin 3 hady.
Viačasłaŭ Papoŭ byŭ vyzvaleny z-pad varty ŭ zale suda pad padpisku ab niavyjeździe da ŭstupleńnia prysudu ŭ siłu i nakiravańnia ŭ papraŭčuju ŭstanovu.
