U Brytanii zabaroniać hałahienavyja lampački
Zhodna z płanami ŭrada, ź vieraśnia u Brytanii budzie zabaronieny prodaž hałahienavych lampačak. Taki krok dazvolić karystalnikam ekanomić na elektryčnaści, a taksama źmienšyć kolkaść vuhlarodnych vykidaŭ na 1,26 miljona ton u hod.
Fota pixabay.com
Brytanija pačała pastupova skaračać prodaž vysokamahutnych hałahienavych lampačak u 2018 hodzie. Ciapier rytejlery nie zdolejuć pradavać bolšaść astatnich vidaŭ hałahienak, naprykład kuchonnyja lampy, piša VVS.
Novyja miery — častka pierachodu da enierhaźbierahalnych śvietładyjodnych lampačak. Ciapier jany składajuć dźvie traciny ŭsich lampačak, jakija pradajucca ŭ Brytanii, ale, jak čakajecca, da 2030 hoda hetaja ličba dasiahnie 85%. Takija lampy pracujuć u piać raz daŭžej, čym hałahienavyja, i dajuć taki ž uzrovień aśviatleńnia, ale pry hetym užyvajuć da 80% mienš enierhii.
Źnižeńnie ŭzroŭniu vykidaŭ, jakoje atrymajecca ŭ vyniku admovy ad hałahienavych lamp, ekvivalentna vyniku, jaki b dało źnižeńnie bolš čym na paŭmiljona kolkaści mašyn na brytanskich darohach. Heta častka pakieta mier, jaki dazvolić karystalnikam ekanomić hrošy i budzie, akramia ŭsiaho inšaha, uklučać prava na ramont tavaraŭ, novyja markiroŭki enierhaefiektyŭnaści i bolš vysokija standarty enierhaefiektyŭnaści dla elektrabytavoj techniki, televizaraŭ i inšych pryboraŭ.
