Błohierku Volhu Takarčuk źmiaścili ŭ karcar
Baćki błohierki siońnia daviedalisia, što ich dačku źmiaścili ŭ karcar u turmie ŭ Žodzinie, piša «Svaboda».
«Siońnia ranicaj my pryvieźli Voli pieradaču ŭ Žodzina, toje, što jana prasiła ŭ liście: ahurki, pamidory, cybulu, sałat, časnyk, čorny chleb. Pieradaču ŭ nas nie pryniali. My daviedalisia, što jaje źmiaścili ŭ karcar da 14 červienia», — skazaŭ baćka Volhi Andrej Takarčuk.
Baćkam skazali, što nibyta Volha parušyła praviły ŭnutranaha rasparadku. U čym parušeńnie, baćkam nie patłumačyli. Mahčyma, heta stanie viadoma paśla naviedańnia advakata.
«Samo pa sabie pazbaŭleńnie voli — heta šok. A karcar — heta šok udvaja», — skazaŭ baćka, były supracoŭnik milicyi. Na maci dvaich niepaŭnaletnich dziaciej, błohierku Volhu Takarčuk zaviali spravu pa troch kryminalnych artykułach: 391-m (Abraza sudździ), 188-m (Paklop) i 342-m (Arhanizacyja i padrychtoŭka dziejańniaŭ, što hruba parušajuć hramadzki paradak, abo aktyŭny ŭdzieł u ich).
Błohierku čarhovy raz zatrymali 19 traŭnia i advieźli ŭ Pieršamajski RUUS, a 23 traŭnia jaje aryštavaŭ prakuror Pieršamajskaha rajonu Miensku. Ź izalataru na Akreścina jaje pieraviali ŭ turmu №8 u Žodzinie.
U błohierki Volhi Takarčuk dvoje niepaŭnaletnich dziaciej — 3 i 7 hadoŭ.
Volha Takarčuk viadzie palityčny błoh, jaki maje kala 37 tysiač padpisčykaŭ.
Raniej jaje vinavacili pavodle administracyjnaha artykułu nibyta za ŭdzieł u niesankcyjanavanaj akcyi. Padstavaj byli jaje błohi, a taksama toje, što jana zapuskała baloniki z haŭbca kvatery. Błohierku nia raz zatrymlivali. Apošni raz schapili 14 traŭnia i paŭdnia pratrymali ŭ RUUS za toje, što jana nibyta machała rukami i brydka łajałasia kala taho RUUS.
