Doŭhaje našeńnie maski moža vyklikać prablemy sa skuraj
Dermatołahi papiaredžvajuć, što kali doŭhi čas nasić masku dla tvaru, heta moža vyklikać prablemy skury nakštałt ekzemy ci dermatytu.
Ekśpierty z łondanskaj balnicy Kinhs-Koledž vyvučyli vypadki fienamienu, što ŭžo atrymaŭ nazvu maskne — vypadki patałohij skury, źviazanyja z našeńniem maski dla tvaru i inšych srodkaŭ indyvidualnaj abarony. U tym liku navukoŭcy źviarnuli ŭvahu na roznyja varyjanty ščytkoŭ dla tvaru, reśpiratary i śpiecyjalnyja akulary, piša Daily Mail.
Zhodna z artykułam, jaki miedyki apublikavali ŭ vydańni British Medical Journal, samaja častaja prablema pry našeńni masak — kantaktny dermatyt, vyklikany razdražnieńniem. U asnoŭnym jon sustrakajecca ŭ vypadkach, kali čałaviek nosić masku bolš za šeść hadzin za dzień. Lačeńnie — spynieńnie našeńnia masak i ŭžyvańnie silikonavaj padkładki pad masku, kab abaranić skuru.
Siarod inšych nastupstvaŭ našeńnia maski dla skury jość tyja, što vyklikanyja reakcyjaj hipieradčuvalnaści na niejki kampanient u składzie maski. Naprykład, heta moža być huma ŭ reśpiratarach abo drot, što vykarystoŭvajuć u adnarazavych maskach, kab jany lepiej trymalisia na tvary. Takija vypadki lepiej lačyć karotkim kursam preparataŭ nakštałt hidrakartyzonu.
Što datyčyć častaty prablem, ź imi sutyknułasia 54% udzielnikaŭ daśledavańnia. Vypadki, kali maska škodzić skury, čaściej za ŭsio byli źviazanyja z pavyšeńniem tempieratury skury i jaje ŭvilhatnieńniem vakoł zony, prykrytaj maskaj. Heta moža vyklikać nie tolki źjaŭleńnie novych chvarob skury, ale i paharšeńnie ŭžo isnujučych, naprykład atapičnaha dermatytu.
