«Biełaruś jak farpost Jeŭrazii»? Ekanamičnaja statystyka śviedčyć: nie, vyklučna Rasii
Ministr zamiežnych spraŭ Uładzimir Makiej. Fota MZS.
«Lubiać u apošni čas kazać pra Jeŭrazii. Jakija pierśpiektyvy adkryvaje, jak pravilna i dobra być dalej ad «zahnivajučaha» Zachadu, — piša ŭ siabie ŭ fejsbuku palitołah Andrej Kazakievič. — Pramaŭlajucca pramovy, pišucca artykuły, knihi ŭsialakija. Kali zamiežnapalityčnaja situacyja zastaniecca raniejšaja, to hetaha ŭ bližejšy čas budzie šmat, impart padobnych idej i formuł z Maskvy paciače curkom.
Realnaść, praŭda, niekalki inšaja. Biełaruś zastajecca krainaj vyklučna postsavieckaj. Jeŭrazijskaha ŭ joj niama amal ničoha. Kali, viadoma nie atajasamlivać paniaćciaŭ «jeŭrazijski» i «rasijski».
Paraŭnańnie handlovaha abarotu Biełarusi i, naprykład, jakoj-niebudź Hiermanii robić heta vidavočnym.
Dola Kitaja ŭ biełaruskim eksparcie składaje kala 0,9% (2019). Dola Kitaja ŭ eksparcie Hiermanii 8%. Kali ŭziać usiu Uschodniuju Aziju, to roźnica ŭžo bolš čym u dziesiać razoŭ (1,12% suprać 12%)
Dola Paŭdniova-Uschodniaj Azii ŭ Hiermanii ŭ 3,6 razu vyšejšaja (1,9% suprać 0,7%);
Zachodniaj Azii — u 3,4 razy (3,8% suprać 1,1%).
Tolki dola Centralnaj i Paŭdniovaj Azii ŭ Biełarusi vyšejšaja — 2,4% suprać 1,4% u Hiermanii.
Usiaho, takim čynam, na Aziju ŭ Hiermanii prypadaje 19% ekspartu, u Biełarusi — 5,4%. Jašče pytańnie, jakaja z krain bolš «jeŭrazijskaja»
Naohuł, struktura ekspartu Biełarusi vielmi kansiervatyŭnaja. Na postsavieckuju prastoru ŭ 2019 prychodziłasia 58,8%, dvaccać piać hadoŭ tamu (1995) było 63%. Dola Jeŭropy taksama pryblizna adnolkavaja. Jak byccam u suśvietnaj ekanomicy za hetyja hady ničoha istotna nie źmianiłasia», — adznačaje palitołah.
