«Histaryčnaje pahadnieńnie»: G7 vyrašyła ŭstalavać adziny padatak dla karparacyj nie mienš za 15%
Krainy G7 damovilisia ŭstalavać adzinuju staŭku padatku dla karparacyj nie mienš za 15%. «Histaryčnaja» ździełka pavinna prymusić najbujniejšyja mižnarodnyja kampanii, siarod jakich Google, Amazon i Facebook, płacić bolš padatkaŭ va ŭsich krainach, dzie jany viaduć biznes, piša Forbes.
Ministry finansaŭ krain G7 damovilisia ŭstalavać adzinuju staŭku padatku na prybytak dla transnacyjanalnych karparacyj na ŭzroŭni nie mienš za 15%. Pra heta ŭ subotu pa vynikach sustrečy kiraŭnikoŭ finansavych viedamstvaŭ «vialikaj siamiorki» zajaviŭ kiraŭnik Minfina Vialikabrytanii Ryšy Sunak.
«Paśla šmathadovych dyskusij ministry finansaŭ G7 dasiahnuli histaryčnaha pahadnieńnia ab refarmavańni suśvietnaj padatkovaj sistemy dla taho, kab jana adpaviadała hłabalnamu ličbavamu stahodździu», — adznačyŭ Sunak.
Čakajecca, što heta pahadnieńnie spynić «honku», jakaja doŭžyłasia ŭžo niekalki dziesiacihodździaŭ, pamiž krainami, što imknulisia pryciahnuć jak maha bolš transnacyjanalnych hihantaŭ nizkimi padatkovymi staŭkami i lhotami, piša Reuters. Ździełka moža lehčy ŭ asnovu pahadnieńnia pamiž krainami G20, častka jakich raniej padtrymała ideju ŭviadzieńnia adzinaha hłabalnaha karparatyŭnaha padatku.
Krainy mnohija hady sprabavali znajści sposab atrymlivać bolš hrošaj ad bujnych transnacyjanalnych karparacyj, takich jak Google, Amazon i Facebook, jakija niaredka śpiecyjalna rehistrujucca ŭ jurysdykcyjach ź nizkimi padatkami, adznačaje ahienctva. Pahadnieńnie G7 — važny krok da taho, kab takija kampanii płacili bolš padatkaŭ va ŭsich krainach, dzie jany viaduć biznes, piša Financial Times.
