Što fitnies-branzalet moža skazać pra zdaroŭje serca?
Fitnies-trekiery časta vykarystoŭvajucca dla padliku krokaŭ, zroblenych za dzień, ale na pakazalniki sardečnaha rytmu taksama treba źviartać uvahu.
Fota Depositphotos.com
Sučasnyja fitnies-branzalety mohuć dać šmat infarmacyi pra vaša serca, siarod jakoj častata sardečnaha rytmu, źmienlivaść, častata ŭ stanie spakoju i inšaja. Navat adzin tolki puls moža być jaskravym pakazalnikam prablem sa zdaroŭjem, piša The Wall Street Journal.
Puls vymiarajecca ŭ kolkaści ŭdaraŭ serca za chvilinu. U darosłaha zdarovaha čałavieka častata sardečnych skaračeńniaŭ u stanie spakoju moža varjiravacca ad 60 da 100 udaraŭ za chvilinu. Dla spartsmienaŭ i tych, chto znachodzicca ŭ dobraj fizičnaj formie, hety pakazalnik moža apuskacca da 40 udaraŭ za chvilinu ŭ stanie spakoju.
Častata sardečnych skaračeńniaŭ pavialičvajecca padčas chadźby, biehu ci inšaj fizičnaj nahruzki, a taksama padčas stresu, pad uździejańniem ałkaholu abo na vyšyni.
Mahčymaść sačyć za svaim pulsam zaŭsiody źjaviłasia adnosna niadaŭna, ale daktary papiaredžvajuć, što pryłady nie zaŭsiody dakładnyja. Vytvorcy fitnies-branzaletaŭ časta nie raskryvajuć ałharytmy, jakija jany vykarystoŭvali dla svaich pryład, abo jak jany praviarali źviestki, što daje ich fitnies-branzalet.
«Z evalucyjnaha punktu hledžańnia isnuje karelacyja pamiž praciahłaściu vašaha žyćcia i bolš nizkim sardečnym rytmam», — śćviardžaje doktar Maajedzi, kardyjołah i kliničny supracoŭnik Univiersiteckaj sietki achovy zdaroŭja ŭ Taronta. Na svaim ułasnym vopycie jana pierakanałasia, što vysoki puls, jaki nie źnižajecca na praciahu sutak, śviedčyć pra peŭnyja parušeńni. U jaje vypadku heta byŭ vostry deficyt žalezu, jaki serca sprabavała kampiensavać vysokim pulsam, kab zadavolić patrebu arhanizma.
«Kali vy chvarejecie, to vaš sardečny rytm u bolšaści vypadkaŭ źmianiajecca», — dadaje Maajedzi. Časam pakazalniki sardečnaha rytmu navat bolš efiektyŭnyja, čym pakazalniki tempieratury, asabliva dla karanavirusa. U daśledavańni, apublikavanym u časopisie Nature, 26 z 32 ludziej, jakija uziali ŭdzieł u ekśpierymiencie, mieli pavyšanuju častatu sardečnych skaračeńniaŭ za dzieviać dzion da źjaŭleńnia simptomaŭ karanavirusa.
Usie vidy sportu źnižajuć pakazalniki sardečnaha rytmu ŭ stanie spakoju. Tamu daktary nastojliva rajać rehularna vyłučać čas na fizičnuju aktyŭnaść.
