Čamu apošnim časam varony tak kryčać u dvarach i što z hetym rabić?
Sajt «Achova ptušak Baćkaŭščyny» piša: im časta telefanujuć uschvalavanyja ludzi, maŭlaŭ, na nas u dvary ci ŭ parku napadajuć varony, što možna z hetym zrabić? Časam ptuški mocna kryčać u dvarach.
Šeravaronka. Fota ptushki.org
Reč u tym, što ŭ kancy maja i pačatku červienia ŭ susiedziaŭ čałavieka — šerych varon — ptušaniaty pakidajuć hniozdy. Ale spačatku jany jašče niadobra latajuć, i padletki mohuć chavacca ŭ travie. Naturalna, ich baćki pryhladajuć za imi i abaraniajuć ich ad patencyjnaj niebiaśpieki.
Kali kala vas z karkańniem, chłopajučy kryłami, lotajuć varony i navat sprabujuć dzieŭbanuć, viedajcie, što niedzie pablizu staiłasia ich ptušania. Baćki ŭsprymajuć čałavieka jak pahrozu małomu. Niepryjemna? Viadoma.
Ale važna razumieć: tak baćki kłapociacca pra ptušaniat. I takija ahresiŭnyja pavodziny ŭ ich nienadoŭha.
Kab navučycca latać, ptušaniaci šeraj varony treba ŭsiaho niekalki dzion, tamu, kali vy sutyknulisia z paračkaj niervovych varon-baćkoŭ, viedajcie: praz 3-4 dni jany pakinuć vaš dvor.
Mnohija ptušaniaty vyskokvajuć z hniazda ŭžo z raspracavanymi kryłami — tady ni varonam-baćkam, ni minakam nie davodzicca chvalavacca.
Što rabić, kali atakujuć šeryja varony?
Nie chvalavacca: varona nie moža surjozna paranić čałavieka, chacia padrapać skuru moža.
Ahledziecca: moža, kala darohi ci ściežki ŭ travie lažyć ptušania. Tady možna pieranieści jaho na 20 mietraŭ dalej ad darohi, dzie chodziać ludzi. Rabić heta treba aściarožna, bo varony buduć napadać, kali ty voźmieš ptušania ŭ ruki. Zachini hałavu parasonam abo prykryj kapiušonam. Taksama varon možna adpužnuć vokrykam.
Kali niezrazumieła, čamu varony atakujuć ludziej na peŭnym učastku, možna paviesić na ŭvachodzie-vychadzie z hetaha ŭčastka tabličku: «Aściarožna — šeryja varony. Lepiej abydzicie». APB padrychtavała makiet takoj tablički ŭ dvuch varyjantach.
Nijakich śpiecyjalistaŭ, hramadskich arhanizacyj, pryrodnych kamitetaŭ u takich vypadkach vyklikać nie treba: heta zvyčajnaja pryrodnaja źjava, i surjoznaha ŭmiašalnictva jana nie patrabuje. Nie treba pomścić varonam.
