Ź juryskonsulta da hienieralnaha dyrektara Tut.by — raskazvajem pra palitźniavolenuju Ludmiłu Čekinu
18 maja da Tut.by pryjšoŭ DFR. Pa kryminalnaj spravie za ŭchileńnie ad spłaty padatkaŭ i zboraŭ u asabliva bujnym pamiery zatrymali 15 čałaviek. Dahetul u SIZA hienieralny dyrektar «Tut Baj Miedyja» Ludmiła Čekina. Što viadoma pra žančynu, jakaja ŭznačalvaje najbujniejšaje miedyja krainy?
Pra prychod u kampaniju
Z adukacyi Ludmiła juryst. Skončyła spačatku kaledž, paśla BDU pa hetaj śpiecyjalnaści. U 2008 hodzie jana pryjšła juryskonsultam u kampaniju «Nadziejnyja sistemy».
«Byŭ niejki internet-forum, na jaki Juryj Anatoljevič Zisier jaje pryvioŭ paznajomicca. I paśla, nakolki ja pamiataju, prapanavaŭ jaje ŭziać da nas. Dahetul my pracavali praktyčna bieź jurysta, ale kamanda vyrasła, nas było nie 5-10 čałaviek, i takaja funkcyja ŭžo była patrebnaja», — zhadvaje suzasnavalnik partała Kirył Vałošyn.
U 2012-m Čekina stała hienieralnym dyrektaram «Nadziejnych sistem». Paśla skončyła kurs Executive MBA ŭ Biznes-škole IPM. U 2017-m uznačaliła «Tut Baj Miedyja». A praz hod zdaryłasia «sprava BiełTA».
«Niahledziačy na jaje žanockaść, Ludmiła mužna reahavała na cisk, zaŭsiody zastavałasia skancentravanaj, dumała najpierš pra supracoŭnikaŭ. Jana vielmi pieražyvała za redakcyju, Marynu Zołatavu. Jaje składana było vybić z kalainy, jana vielmi mocnaja.
Ludmiła — kampietentny i adkazny supracoŭnik. Bolš za toje, jana dušeŭny i spahadlivy čałaviek.
Heta moža hučać banalna, ale inakš jana by tut nie pracavała. Adbor, asabliva ŭ toj čas, kali prychodziła Ludmiła, byŭ pa kaštoŭnaściach, praz doŭhija razmovy, kab razumieć, što čałaviek maje adnu z vami kartu realnaści, adroźnivaje biełaje ad čornaha», — dzielicca Kirył Vałošyn.
Pra syna-studenta, dvuch katoŭ i lubimyja sieryjały
Ludmiła rodam z rasijskaha Sierhijevaha Pasada. Baćki taksama z Rasii, tata dahetul žyvie tam, vałodaje kramaj elektronnych tavaraŭ.
U Minsku žančyna žyła razam z 19-hadovym synam Alaksiejem. Tolki niadaŭna jon źjechaŭ na asobnuju kvateru ŭ šmatpaviarchoviku niepadalok. Chłopiec vučycca veb-dyzajnu ŭ BDU.
«Mama chacieła, kab ja ŭ IT išoŭ. Dyj ja byŭ nie suprać, bo prahramavańnie — cikavaja dla mianie śfiera. Chacieŭ u hetym hodzie pieraddypłomnuju praktyku prachodzić u Tut.by, ale, vidać, užo nie atrymajecca», — kaža Alaksiej.
Jon adzinaje dzicia ŭ siamji. Uśmichajecca, što mama dahetul jaho bałuje, naprykład vodzić u kafe.
«My lubim z mamaj hulać pa horadzie. Paśla taho jak ja źjechaŭ, u hości časta da jaje zachodziŭ. Z 12 hadoŭ baćki ŭ razvodzie. Doma ŭ nas zaŭsiody było łajalnaje asiarodździe. Ja i sam nie asabliva dzivačyŭ, z rańniaha ŭzrostu byŭ vychavany — nie skvapicca, nie kapryźničać», — raspaviadaje chłopiec.
Jon ciapier dahladaje dvuch katoŭ. Voś jak jany źjavilisia ŭ siamji:
«Ja tady byŭ u adnosinach, i maja dziaŭčyna vielmi chacieła kata. My damovilisia ŭziać Oskara. Jaho pryvieźli nam zusim maleńkim. Paśla jana znajšła jašče biazdomnaje kaciania — taksama zabrali da siabie. My žyli tady ŭsie razam z mamaj, tak katy zastalisia ŭ nas. Mama, darečy, dapamahaje zoaarhanizacyjam — to finansava, to rečami».
Fota Tut.by
U volny čas Ludmiła čytała knihi, dahladała sad kala doma, hladzieła sieryjały. U jaje padborcy lubimych — «Małady papa» i cykł VVS «Biełaja karaleva», «Biełaja pryncesa» i «Ispanskaja pryncesa» pra baraćbu za tron u Anhlii XV-XVI stahodździaŭ. Słuchała «Lekcyi pa ruskaj litaratury» i «Adkryty ŭrok» Dźmitryja Bykava.
U adnym intervju hiendyrektar dzialiłasia svaim padychodam da hrošaj:
«Ja zaŭsiody adkładaju. Dla tych, čyjo staleńnie prypała na 90-ja, heta pytańnie biaśpieki: zabiaśpiečyć siabie i svoj rod da 13 kalena. Navat u tyja časy, kali zarablała nie vielmi šmat, znachodziła sposaby zrabić zapas. Ale pry hetym da hrošaj staŭlusia dastatkova lohka: jany dla mianie nie samameta. Hrošy pavinny prynosić hrošy, prosta lažać na kartcy im sumna».
Pra vobšuk i praŭładnyja kanały
«Mama nie asabliva pakazvaje svaje pieražyvańni. Ale jana była zaŭsiody na suviazi z kalehami, starałasia razabracca sa spravami. Bačna było, što jana niervavałasia, kali sudy išli, usimi siłami sprabavała heta razrulić», — raskazvaje syn pra atmaśfieru apošnich miesiacaŭ.
Alaksiej byŭ na parach, kali daviedaŭsia z navin, što da supracoŭnikaŭ Tut.by pryjšoŭ DFR.
«Naturalna, ja adrazu pajechaŭ u ofis da ich, hladzieć, što zdaryłasia. Tam było ŭsio apiačatana, dźviery zamazanyja bałončykam. Na inšych pavierchach nichto nie viedaŭ, što adbyvajecca. Ja adpraviŭsia dadomu spačatku da siabie. Baču, što dźviery adkrytyja, usio abšukana, kampjutar zabrali. Paśla pajšoŭ za katami ŭ maminu kvateru. U jaje dastali rečy z kładoŭki, knihi, palicy raźviarnuli. Ja dahetul nie mahu znajści tam akumulatary ad hazonakasiłki.
U niejkaj stupieni my čakali, što mohuć pryjści aryštavać usich z partała pa sfabrykavanaj spravie. Rychtavalisia na hety vypadak: viedali, što z rečaŭ sabrać, trymali pad rukoj kantakty».
Toje, što pra mamu pišuć praŭładnyja kanały i miedyja, Alaksiej starajecca nie čytać.
«Ahidna takoje hladzieć. Asabliva toje, jak niekatoryja paśladoŭniki režymu prychodziać u sacyjalnyja sietki Tut.by i pišuć: vas daŭno treba było pierastralać. Nie razabralisia, što adbyvajecca, ale hatovyja za prapahandysckimi ŚMI kudy zaŭhodna iści».
Pakul syn čakaje Ludmiłu doma, jon nie zastajecca adzin: «Usie adnakurśniki viedajuć, kažuć: kali što, źviartajsia pa dapamohu. I susiedzi padtrymlivajuć».
