U jakich mižnarodnych konkursach pieramahali biełaruskija pryhažuni?
U śviecie źjaŭlajecca ŭsio bolš unikalnych konkursaŭ pryhažości, dzie niama nijakich standartaŭ, etałonaŭ, paramietraŭ. Uzrost, fihura, rost, vaha adychodziać na druhi płan. Miežy «idealnaha» pašyrajucca, a časam i zusim źnikajuć. I ŭ mnohich takich konkursach biełaruskam niama roŭnych.
Taćciana Bredzieleva i Alaksandra Čyčykava
Naprykład, samaj pryhožaj zamužniaj žančynaj płaniety Mrs. Globe-2017 stała «Mis Biełaruś-1998» Śviatłana Kuźniacova (u dziavoctvie — Kruk) — mama traich dziaciej, nastaŭnica matematyki. Da hetaha ŭ 2013-m jana pieramahła ŭ konkursie «Misis Suśviet», davioŭšy, što maciarynstva mianiaje žančynu tolki ŭ lepšy bok.
Paśla hetaha biełaruski hučna zajavili pra siabie na mižnarodnym konkursie pryhažości siarod dziaŭčat na invalidnych vazkach, jaki ŭpieršyniu prajšoŭ u Polščy ŭ 2017 hodzie. 23-hadovaja studentka pieduniviersiteta Alaksandra Čyčykava zavajavała hałoŭnuju karonu Miss Wheelchair World, choć u takim konkursie kožnaja z udzielnic była nievierahodnym prykładam pryhažości, mužnaści i siły duchu.
«Usie našy strachi i abmiežavańni tolki ŭ hałavie, — zapeŭnivaje Alaksandra. — Usio zaležyć tolki ad čałavieka, jaho charaktaru, usprymańnia śvietu i samoha siabie. Jość u mianie takaja rysa: vočy bajacca, a ruki robiać. Ja spačatku sprabuju, a potym užo rablu vysnovy. Byvajuć dni, kali ŭsio, z čym my sutykajemsia, heta sucelnyja barjery, jakija pieraškadžajuć ruchacca napierad. U takija momanty našy mary zdajucca nastolki niedasiahalnymi, što chočacca ŭsio kinuć. Heta značyć zdacca? Mienavita heta hałoŭnaja pamyłka. Sprabujcie, navat kali strašna».
Arhanizatary płanavali paŭtaryć hety prajekt letaś, ale praz pandemiju ŭsie suśvietnyja konkursy byli pieraniesieny na 2021 i 2022 hady. Tamu Alaksandra pakul adzinaja i niepaŭtornaja «Mis śvietu na kalascy».
U kancy minułaha hoda śviet daviedaŭsia imia jašče adnoj biełaruski: 57-hadovaja Taćciana Bredzieleva pieramahła na mižnarodnym konkursie pryhažości dla žančyn va ŭzroście 46+ — Mrs. Top of the World Classic 2020.
Jon taksama pravodziŭsia ŭpieršyniu i arhanizatary vyrašyli nie admianiać jaho, a praviali ŭ anłajn-farmacie. Finał doŭžyŭsia try dni. Karonu pieramožcy imknulisia atrymać kankursantki ź dziasiatka krain, u tym liku Bielhii, Łatvii, Rasii i navat Surynama.
Adnym z etapaŭ konkursu było pradstaŭleńnie videavizitoŭki, u jakoj Taćciana raspaviała pra Biełaruś, pra toje, jakimi žančynami hanarycca naša kraina. Videavizitoŭku zdymali ŭ muziei Suła, a taksama ŭ lubimaj ustanovie Minska — inkluziŭnaj kaviarni. Hramadstva roŭnych mahčymaściaŭ — voś toje, ab čym maryć Taćciana.
I sioleta prajekt budzie mieć praciah. Užo možna skazać, miarkujučy pa cikavaści inšych krain, udzielnic budzie značna bolš. Taćciana, jak pieršaja karaleva konkursu, zapisała dla budučych kankursantak pramovu.
«Konkurs» Ms Top of the World Classic « — heta samaje spantannaje rašeńnie ŭ maim žyćci, pra jakoje ja nivodnaj chviliny nie škadavała, — pryznajecca Taćciana. — Pabyvać u roli karalevy časam chočacca kožnaj. Navat kali vam 55+. I heta nie tolki emocyi i vonkavyja źmieny. Heta vialikaja ŭnutranaja praca nad saboj. Bo sprava nie ŭ karonie, nie ŭ šykoŭnaj sukiency i darahich tuflach.
Nieabaviazkova nasić karonu, kab być karalevaj… Možna i kapialuš, kali nieści jaho pa-karaleŭsku! Ja chacieła pakazać, što biełaruskija žančyny pryhožyja ŭ lubym uzroście, roście i vazie, što pryhažość nie vianie z uzrostam, što hramadstva roŭnych mahčymaściaŭ dla ŭsich — heta nie prosta słovy. Unutry kožnaj dziaŭčyny žyvie karaleva. Treba tolki nie zabyvać pra heta, pra karaleŭskuju pastavu, pohlad, chadu. Kožnaja žančyna pryhožaja nastolki, nakolki jana ŭpeŭnienaja ŭ sabie!»
Hetyja prajekty byli arhanizavany z adnoj tolki metaj — źmianić ujaŭleńnie ab pryhažości tolki jak ab źniešniaj abałoncy, razburyć barjery ŭ śviadomaści ludziej va ŭsim śviecie. Pakazać, što niama nijakich abmiežavańniaŭ — ni fizičnych, ni uzrostavych — dla taho, kab praciahvać vieści aktyŭny ład žyćcia, zachoŭvać pryhažość, uražvać talentami, iści da svajoj mary, niahledziačy na abstaviny. I ŭ biełaruskich pryhažuń vialiki patencyjał.
