«Upieršyniu čuju, u čym mianie abvinavačvajuć»: u Minsku pačaŭsia sud nad žurnalistkaj Tut.by Kaśpiarovič
U sudzie Maskoŭskaha rajona prachodzić sud nad žurnalistkaj Tut.by Luboŭju Kaśpiarovič. Jaje abvinavačvajuć va ŭdziele ŭ niesankcyjanavanym masavym mierapryjemstvie — č. 1 art. 24.23. Luboŭ była zatrymanaja ŭ piatnicu kala Doma pravasudździa ŭ Minsku, dzie prachodzić praces nad studentami, piša Tut.by.
Tut.by
Spravu razhladaje sudździa Siarhiej Kacar. Luboŭ udzielničaje ŭ pasiadžeńni pa skajpie. Kacar začytvaje, što Luboŭ abvinavačvajuć va ŭdziele ŭ niesankcyjanavanym masavym mierapryjemstvie — č.1 art. 24.23
Žurnalistka adrazu zajaviła, što pobač ź joj prachodzić inšy praces — sudziać Anatola Labiedźku, tamu jana vielmi drenna čuje toje, što kaža sudździa. Sudździa niekalki razoŭ paŭtaraje svaje pytańni ab jaje bijahrafii, začytvaje jaje pravy — Luboŭ čuje ŭsio heta tolki častkova.
Kaśpiarovič spačatku zajaviła pieršaje chadajnictva: praz 10 chvilin, u 11.15, zakančvałasia 72 hadziny paśla jaje zatrymańnia, i jana dahetul nie viedaje, za što jaje zatrymali i za što jana znachodzicca ŭ IČU na Akreścina — prosić aznajomić jaje z pratakołam zatrymańnia i pravaparušeńnia.
— Ja ŭpieršyniu ad vas čuju, u čym mianie abvinavačvajuć, — zajaviła žurnalistka sudździ.
— U pratakole majecca adznaka, što vy admovilisia ad atrymańnia kopii pratakoła, rabić adznaku, što vam tłumačylisia vašy pravy i abaviazki, admovilisia padpisvać pratakoł, — skazaŭ sudździa.
— Heta chłuśnia. Kali rabili vopis majoj majomaści, praz 5 hadzin paśla zatrymańnia, ja rabiła ŭ pratakole vopisu adznaku, što mnie nie patłumačyli, za što ja zatrymanaja, — zajaviła Kaśpiarovič.
Sudździa Kacar admoviŭ žurnalistcy ŭ chadajnictvie — jana nie zmoža aznajomicca z pratakołam.
Kaśpiarovič zajaviła jašče adno chadajnictva — parazmaŭlać z advakatam Andrejem Mačałavym.
Abaronca taksama zajaviŭ chadajnictva — pahutaryć z padabaronnaj, sud jaho zadavoliŭ, ale daŭ tolki 7 chvilin. Z zały paprasili vyjści ŭsich, akramia advakata i sakratara sudździ — jana prysutničała pry kanfidencyjnych znosinach padabaronnaha z advakatam.
Paśla razmovy z žurnalistam advakat Mačałaŭ paprasiŭ sudździu dać jamu čas, kab aznajomicca sa spravaj. Sudździa zadavoliŭ chadajnictva, u sudzie byŭ pierapynak da 11.40.
Paśla pierapynku advakat zajaviŭ, što ŭ spravie majecca pratakoł, u jakim paznačana, što Luboŭ była zatrymanaja 14 maja ŭ 11.15. Heta značyć 72 hadziny administracyjnaha zatrymańnia skončylisia, i žurnalista pavinny adpuścić, vyklučeńniaŭ u zakonie niama. Advakat chadajničaŭ, kab Kaśpiarovič vyzvalili z-pad varty i vyklikali ŭ sud pozvaj.
Sudździa chadajnictva adchiliŭ.
— U suviazi z tym, što razhlad spravy sud užo pačaŭ, Luboŭ Viktaraŭna praz skajp udzielničaje, advakat udzielničaje — pieraškod dla razhladu spravy niama, — zajaviŭ Siarhiej Kacar.
Advakat Mačałaŭ u adkaz na heta zajaviŭ advod sudździ.
Sudździa syšoŭ u daradčy pakoj, kab pryniać rašeńnie.
U pierapynku advakat raspavioŭ, što Luboŭ adčuvaje siabie dobra, u jaje ŭsio narmalna.
