Piatla na šyi Prybałtyki
Čamu sajuz ź Biełaruśsiu krytyčna važny dla Rasii z vajenna‑palityčnaha punktu pohladu?
Čamu sajuz ź Biełaruśsiu krytyčna važny dla Rasii z vajenna‑palityčnaha punktu pohladu?
«Małočnaja vajna» Maskvy i Minska spynienaja. Sprava vyrašanaja, i, miarkujučy pa ŭsim, abodva baki zadavolenyja.
Adnak toje ciarpieńnie, jakoje demanstruje Kreml padčas raźviazańnia sprečak z emacyjnym Baćkam, mimavoli vyklikaje pytańnie: ci vartaja vyčynki hetaja biełaruskaja aŭčynka? Navošta Rasija tak trymajecca za choć i bratniuju, ale ŭsio ž taki niebahatuju krainu?
Jakuju cikavaść moža ŭjaŭlać dla Rasii maleńkaja lasistaja kraina, praktyčna całkam pazbaŭlenaja pryrodnych resursaŭ, ź jakich na jaje terytoryi jość u zaŭvažnaj kolkaści tolki sol dy torf? Torfu, praŭda, šmat: 9 tys. bujnych bałotaŭ dajuć značny zapas hetaje syraviny.
Adzinym kaštoŭnym resursam Biełarusi, jaki robić jaje pryvabnaj dla Rasii, źjaŭlajecca jaje stanovišča stratehičnaha pieradpolla. Možna skazać, što
siońnia RB — heta klin, ubity ŭ hłybiniu NATA, «stratehičny bałkon», što navisaje nad jeŭrapiejskim teatram vajennych dziejańniaŭ.Heta cudoŭna razumieje i prezident Alaksandr Łukašenka — bolš za toje, adkryta zaklikaje vykarystoŭvać taki padarunak hieahrafii.
«Biełaruś pavinnaja efiektyŭniej vykarystoŭvać svajo hieapalityčnaje stanovišča, — zajaviŭ 23 studzienia 2007 hodu Łukašenka na naradzie ŭ Navapołacku pa pytańniach padrychtavanaści krainy da pracy ŭ novych koštavych umovach pastavak paliŭna‑enerhietyčnych resursaŭ. — Rasija maje unikalny resurs — vuhlevadarody. Naš stratehičny resurs — hieapalityčnaje stanovišča. My pavinnyja vykarystoŭvać jaho tak, jak Rasija vykarystoŭvaje svaje resursy».
Kali zirnuć na kartu, robicca vidavočnym toje, što Biełaruś faktyčna jość «piatloj na šyi Prybałtyki» i šmat u čym abiasceńvaje jaje stratehičnaje stanovišča.
Pamiž terytoryjami RB i Kalininhradskaj vobłaści lažyć 70‑kiłamietrovy kalidor, pa jakim prachodzić adzinaja suchaziemnaja daroha, što źviazvaje krainy Bałtyi ź inšymi krainami NATA. Zrazumieła, što hetaja arteryja moža być pierarezanaja paraŭnalna nievialikimi siłami, a pry paśpiachovym raźvićci padziejaŭ zrobicca suchaziemnym mastom u Kalininhradskuju vobłaść.
Chacia amal usie biełaruskija darohi vyciahnutyja ŭ šyrotnym kirunku, terytoryja «biełaruskaha bałkona» daje mahčymaść chutkaha manioŭru ŭzdoŭž mierydyjana.
Prykładami takich apieracyjaŭ słužać kancentracyja 2‑ha (Niomanskaha) rasijskaha vojska suprać Uschodniaj Prusii ŭ žniŭni 1914‑ha, pavarot 2‑ha tankavaha vojska Huderyjana na Kijeŭ letam — vosieńniu 1941‑ha, dziejańni vojskaŭ Bahramiana i Čarniachoŭskaha suprać Prybałtyki ŭ 1944 hodzie. Možna sfarmulavać ahulnaje praviła, pavodle jakoha pry lubym kanflikcie Rasii i Jeŭropy boku, jaki zachopić inicyjatyvu, vyhadny kantrol nad Biełaruśsiu. Pry hetym, jak pakazvaje praktyka, lasista‑bałocisty charaktar miascovaści chacia i ŭskładniaje takija apieracyi (asabliva kali vykarystoŭvać tanki), ale zusim nie robić ich niemahčymymi.
Siońnia ŭ Biełarusi Rasijskaja armija pradstaŭlenaja tolki abjektami SPA i SRA, jakija zabiaśpiečvajuć sumiesnuju pavietrana‑kaśmičnuju abaronu, i vuzłom dalokaj marskoj radyjosuviazi. Razmova pra Asobny radyjotechničny vuzieł u pasiołku Hancavičy (pobač z Baranavičami), dzie raźmieščany radar sistemy papiaredžańnia pra rakietny napad (SPRN) typu «Vołha», zdolny znachodzić pavietranyja celi na adlehłaści da 4800 km, a taksama abjekt «Antej» (43‑i vuzieł suviazi) u Vilejcy — radyjostancyja zvyšdaŭhachvalevaha dyjapazonu, jaki zabiaśpiečvaje suviaź sa stratehičnymi APŁ, što znachodziacca pad vadoju.
Inšych vajennych abjektaŭ RF, jak i inšych vajskovych častak i vajskovych bazaŭ, u RF u Biełarusi niama. U vypadku vajennaj pahrozy Rasija spadziajecca na sajuznaje biełaruskaje vojska. Bolš za toje, u vypadku razhortvańnia RB sumiesnaha hrupavańnia vojskaŭ pavodle Sajuznaj damovy jana padparadkoŭvajecca MP RB. U vypadku razhortvańnia takoha hrupavańnia
zacisnutaja pamiž Biełaruśsiu i Rasijaj Prybałtyka stanie achilesavaj piatoju NATA, prykryvać jakuju daviadziecca ź vialikimi vysiłkami, a jaje bajavaja ŭstojlivaść ujaŭlajecca sumnieŭnaj.
U paraŭnańni z mahčymaściu ŭ pahroźlivy pieryjad raźmiaścić svaje vojski na terytoryi RB usie astatnija bonusy ad vajenna‑stratehičnaha partniorstva ź Minskam adychodziać na druhi płan. Sapraŭdy, biełaruskaja SPA pry nahodzie značna ŭskładnić žyćcio avijacyi NATA, ale razhortvańnie niepasredna ŭ Rasii, na terytoryi Smalenskaj vobłaści značnaha hrupavańnia zienitnych rakietaŭ vialikaj dalnaści moža ŭ značnaj miery kampiensavać straty ŭ vypadku admovy Minska ad sajuznych stasunkaŭ. Dzirka ŭ radyjołakacyjnym poli, jakaja ŭźniknie paśla straty radaru «Vołha», choć i niepryjemnaja, ale moža być kampiensavanaja razhortvańniem stancyjaŭ SPRN novaha pakaleńnia «Varoniež‑DM». Aproč 43‑ha vuzła Hałoŭny štab VMF maje jak minimum adnu reziervavuju stancyju dla suviazi z APŁ. Tamu
z punktu pohladu SPA/SRA/SIAS (stratehičnych jadravych siłaŭ) hipatetyčnaja strata abjektaŭ u Biełarusi nie jość niepapraŭnaj.
Inšaja sprava — Suchaziemnyja vojski.Niemahčymaść vykarystoŭvać biełaruskuju terytoryju zapatrabuje ad Rasii vyklučnych vysiłkaŭ pa naroščvańni suchaziemnaha hrupavańnia ŭ zachodnich i paŭnočna‑zachodnich rajonach. I, mahčyma, vychadu z damovy pa RSMD i stvareńnia novych pakaleńniaŭ rakietaŭ siaredniaj dalnaści dla previentyŭnych udaraŭ pa rajonach kancentracyi ŭdarnych hrupavańniaŭ NATA. Z vajenna‑palityčnaha punktu pohladu Biełaruś pavinnaja zastavacca stratehičnym chaŭruśnikam Rasii što b ni było. Pakul u Minsku pry ŭładzie Łukašenka, damaŭlacca ź im, chutčej za ŭsio, atrymajecca, što i pakazali niadaŭnija padziei. «Małočnaja vajna» ŭ sieradu, zdajecca, skončyłasia.
