Ad burhieraŭ da tortaŭ. U Minsku adkryli pieršy viehanski supiermarkiet FOTA
U kulturna-dziełavym kvartale «K21» adkryŭsia supiermarkiet Vegetus, u jakim pradajucca tysiačy vegan-friendly praduktaŭ. Na miescy taksama varać supy, lepiać pielmieni, hatujuć desierty biez cukru i robiać smuzi.
Supiermarkiet znachodzicca ŭ budynku na rahu vulic Kalvaryjskaj i Drazda — źleva ad arki-partała va ŭnutrany dvoryk «K21».
Vitryny zbolšaha zajmajuć «niemałako» i «niamiasa»: dziesiatki vidaŭ sojevaha miasa i małaka. Ź cikavaha — amierykanskija katlety dla «alternatyŭnych burhieraŭ», jakija stvaryli ažyjataž u ZŠA. Stełažy zapoŭnienyja sokami, krupami, kansiervami i zakatkami. Šmat miesca vydzielena pad biezhlutenavyja pradukty.
U kramie raźlivajuć siropy i žamieryny z sadaviny. Taksama možna kupić arechi, rys, kakava-baby abo suchafrukty. U jakaści materyjałaŭ dla pakietaŭ vykarystoŭvajuć nie cełafan abo polietylen, a ekałahična čystuju papieru.
Pry kramie dziejničaje kafe, dzie hatujuć supy i haračyja stravy: naprykład, pielmieni, spahieci i hałubcy z sojevym miasam. Kandytary na miescy stvarajuć pryhožyja desierty, pudynhi, cukierki, torty i smuzi biez łyžki cukru. Usio možna zabrać «z saboj».
Viehanski supiermarkiet pracuje ŭ kvartale «K21» z 10 da 21 hadziny ŭ pracoŭnyja dni i z 11 da 19 — u vychodnyja. Pakupnikoŭ absłuhoŭvajuć dźvie kasy. Chutka pobač z kramaj źbirajucca uładkavać letniuju terasu, jakaja zmoža źmiaścić da 50 čałaviek.
