«Spynić represii i adnavić na pracy»: bolš za 70 dziejačaŭ kultury padpisali adkryty list u abaronu movy, kultury, svabodaŭ
Bolš za 70 ekśpiertaŭ u halinie biełaruskaj movy i kultury padpisali adkryty list, inicyjavany Pracoŭnaj hrupaj pa padtrymcy biełaruskaj movy i kultury Kaardynacyjnaj rady.
«Biełaruskaja mova i nacyjanalnaja kultura apynulisia ŭ vielmi ciažkim stanoviščy. Heta vynik nie tolki maštabnaha dziaržaŭnaha kryzisu apošnich miesiacaŭ, ale i minułych dvaccaci šaści hadoŭ. Pry hetym zaniapad biełaruskaj kultury — nie prosta źbieh abstavin ci niejkich źniešnich faktaraŭ, a vynik dziaržaŭnaj palityki: palityki zhortvańnia biełarusizacyi, baraćby z ułasnaj spadčynaj i nacyjanalnaj pamiaćciu, baraćby ź biełaruskaściu, budavańnia nie paŭnavartasnaj nacyjanalnaj kultury niezaležnaj dziaržavy, a zaležnaj, druhasnaj, reštkavaj kultury», — havorycca ŭ liście.
Padpisanty vypracavali płan ratavańnia biełaruskaj movy i kultury ŭ śfiery dziaržaŭnaha budaŭnictva, adukacyi, kultury, infarmacyjnaha pola, da jakoha jany hatovyja asabista dałučycca.
Pry hetym aŭtary zvarotu nazyvajuć šerah pieradumovaŭ:
— Nieadkładnaje spynieńnie palityčnych represij u dačynieńni da ŭsich dziejačaŭ kultury i mastactva, jak i da ŭsich hramadzian Biełarusi.
— Vyzvaleńnie palitviaźniaŭ, zabieśpiačeńnie mahčymaści bieśpieraškodna pryjechać u Biełaruś tym, chto byŭ vyhnany z krainy.
— Adnaŭleńnie na pasadach dziejačaŭ kultury, zvolnienych i vymušanych zvolnicca pa palityčnych matyvach; zabieśpiačeńnie im raniejšych umoŭ pracy; pryciahnieńnie da adkaznaści vinavatych u supraćpraŭnym zvalnieńni.
— Praviadzieńnie novych, sumlennych vybaraŭ, paśla čaho novyja ŭłady, majučy narodny davier, zmohuć ažyćciaŭlać nieabchodnyja reformy i źmieny ŭ zakanadaŭstvie.
Siarod padpisantaŭ — nobieleŭskaja łaŭreatka Śviatłana Aleksijevič, piśmieńniki Uładzimir Arłoŭ, Uładzimir Niaklajeŭ, Alhierd Bacharevič, Hanna Sieviaryniec, navukoŭcy i vykładčyki Natalla Dulina, Natalla Sivickaja, Nadzieja Staravojtava, Alaksandr Fiaduta, Alaksandr Kraŭcevič, Aleś Bieły, Aleś Paškievič, Siarhiej Chareŭski dy inš.
