Na prychilnika Łukašenki, jaki ŭdaryŭ doktara ŭ Breście, zaviali kryminalnuju spravu
U dačynieńni da 55-hadovaha bieraściejca, jaki ŭdaryŭ fielčara, raspačali kryminalnuju spravu za chulihanstva. Jak vynikaje z paviedamleńnia milicyi, da kanfliktu na palityčnaj hlebie, jaki trapiŭ na videa, mužčyna ŭdaryŭ jašče adnaho miedyka.
Nahadajem, što incydent zdaryŭsia 5 studzienia ŭ traŭmapunkcie Bresckaj balnicy. Hety mužčyna (Mikałaj) hučna svaryŭsia, a zatym udaryŭ doktara chutkaj Andreja Rakału pa tvary.
Mužčynu raniej padabrali na prypynku z prykmietami ałkaholnaha apjanieńnia. Da jaho i vyjechała bryhada Andreja Rakały.
Pa ŭspaminach doktara, daroha była niervovaj: 55-hadovy mužčyna «supraciŭlaŭsia, łajaŭsia, źbiraŭsia vyjści z mašyny». Miedyki jaho prytrymlivali, kab jon nie nanios sabie traŭmy.
— Jon kazaŭ, jak lubić prezidenta, milicyju, jakija ŭsie małajcy. My prosta maŭčali i ničoha nie kazali ŭ adkaz, — zhadvaŭ Andrej.
Miedyki pryvieźli mužčynu ŭ balnicu — i tam jon spačatku ŭdaryŭ fielčara pa nazie, raspaviadaje Andrej. Užo tady daviałosia vyklikać milicyju.
— Pryjšoŭ učastkovy. Skazaŭ, što budzie prymać zajavu ad našaha fielčara. Jana davała pakazańni ŭ naziralnym kabiniecie, a my stajali ŭ kalidory. Hety mužčyna byŭ u susiednim naziralnym kabiniecie — jaho tam ahladaŭ traŭmatołah. Raptam u niejki momant jon vybieh, pačaŭ łajacca i ŭdaryŭ mianie, — uspaminaje doktar.
U Andreja była ČMT, i jon byŭ vymušany syści na balničny.
