Da jubileju Kupałaŭskaha teatra za dziaržaŭnyja srodki zdymałasia niekalki filmaŭ. Što ź imi ciapier?
U telehram-kanale «Śviaŝiennyj Biełavud» źjaviłasia infarmacyja ab tym, što stvoranyja da stahodździa Kupałaŭskaha dakumientalnyja filmy, a taksama dźvie novyja ihravyja karciny Nacyjanalnaj kinastudyi z udziełam byłych akcioraŭ teatra pakładzieny na palicu. Pahavaryli sa studyjami, što zdymali hetaje kino.
Da jubileju teatra Ministerstva kultury zamoviła, adpaviedna, i vydzieliła hrošy na čatyry dakumientalnyja karciny. Dźvie stvaralisia na studyi histaryčnych filmaŭ «Majsternia Uładzimira Bokuna», dźvie — na kinastudyi «Biełaruśfilm».
Studyja Uładzimira Bokuna svaje karciny ŭžo «zdała». Viadoŭcami ŭ filmach «Kupałaŭski na chvali historyi» i «Hienietyčny kod — teatr» źjaŭlajucca byłyja kupałaŭcy Raman Padalaka i Pavieł Charłančuk. Praca nad stužkami viałasia ceły hod, pieršuju karcinu majsternia pašyryła i padrychtavała taksama jaje televizijny čatyrochsieryjny varyjant.
Jak paviedamili na studyi, aficyjnaj zabarony na filmy pra Kupałaŭski teatr niama, jany pryniatyja zakazčykam, to-bok ministerstvam, ale ŭ toj ža čas tam razumiejuć, što prapanoŭvać ich na telebačańnie, a tym bolš arhanizoŭvać premjeru na vialikim ekranie ciapier biessensoŭna.
Karciny «Biełaruśfilma», pa słovach dyrektara studyi «Letapis» Aksany Ejchart, pakul znachodziacca ŭ vytvorčaści: film Haliny Adamovič «Hałoŭnyja režysiory Nacyjanalnaha teatra» budzie hatovy nieŭzabavie, a zdača raboty Natalli Žamojdzik «Adviečnyja temy» zapłanavana na kaniec sakavika. «Prosta hladzieć na hetyja tvary, na akcioraŭ vielmi cikava. U nas šmat płanaŭ pa realizacyi, moža być, našy raboty i raboty «Majsterni Bokuna» buduć pakazvacca razam».
«Nie treba rabić z muchi słana: nichto nie dapuścić, kab filmy, zroblenyja za dziaržaŭny košt, prosta lahli na palicu, — kamientuje dyrektar kinastudyi Uładzimir Karačeŭski. — Karciny pra Kupałaŭski ciapier znachodziacca ŭ vytvorčaści, my vykonvajem dziaržzamovu, jaje nichto nie admianiaŭ, pracedura zakupki adbyłasia. Kali film hatovy, my prymajem rašeńnie, što ź im rabić, dzie i jak pakazvać, pry mnie jašče nivodzin nie loh na palicu. Jany znojduć svajho hledača — nie varta raniej času razduvać skandał, byccam my niešta chavajem».
Na čutki pra toje, što stužki «Avanciury Pranciša Vyrviča» i «Kupała» nie pakazvajucca praz udzieł u ich byłych akcioraŭ Kupałaŭskaha teatra, Uładzimir Karačeŭski kaža: «Takoj zadačy nam nichto nikoli nie staviŭ. Mnie što, treba pierastać pradavać i pakazvać biblijateku za apošnija dziesiać hadoŭ? Kažu ščyra: heta čutki i domysły, nie varta davodzić ich da absurdu. Ciapier my zajmajemsia tym, kab pierakłaści «Avanciury» na biełaruskuju movu, pryčym zrabić heta na našaj novaj tonstudyi, i pakazać biełaruskamoŭnuju viersiju paśla pandemii.
Dla abodvuch hetych filmaŭ ja čakaju najlepšaha času i dumaju, jak ich pradać i pakazać z maksimalnaj vyhadaj. Kinaprakat ledź pačynaje adradžacca, navat našumiełyja «Uroki piersidskaj» nie sabrali poŭnyja zały, tamu nie baču sensu arhanizoŭvać pakazy ŭ pustych kinateatrach, bo prakat — adna z krynic dachodu kinastudyi».
