Partyja Mierkiel abrała novaha kiraŭnika. Vierahodna, heta budučy kancler Niamieččyny
Bolšaść delehataŭ na schodzie niamieckaj partyi Chryścijanska-demakratyčny sajuz (CHDS) prahałasavali za toje, kab novym lidaram partyi staŭ kiraŭnik fiederalnaj ziamli Paŭnočny Rejn-Viestfalija Armin Łašet, paviedamlaje Welt.
Sieg in Stichwahl gegen #Merz: #Laschet ist neuer #CDU-Vorsitzender https://t.co/RNFPeBRcda via @welt#cdupt21#CDUVorsitz
Za jahonuju kandydaturu prahałasavaŭ 521 čałaviek, jašče 466 delehataŭ padtrymali byłoha lidara frakcyi Frydrycha Mierca. Čatyry čałavieki ŭstrymalisia. Usiaho na hetu pasadu pretendavali try čałavieki, staršynia kamiteta bundestaha pa źniešniaj palitycy Norbert Rothien vybyŭ z honki ŭ pieršym tury. Vyniki pavinny być aficyjna paćvierdžany hałasavańniem pa pošcie.
Da 2018 hoda partyjaj z 2005 hoda kiravała Anhieła Mierkiel, paśla jaje — Aniehret Kramp-Karenbaŭer, ale apošniaja ŭ lutym 2020 hoda vyrašyła syści ŭ adstaŭku i admoviłasia zmahacca za pasadu kanclerki Niamieččyny.
Vybary ŭ bundestah, pa vynikach jakich budzie sfarmavany novy ŭrad, pavinny prajści 26 vieraśnia.
Pa tradycyi kancleram pavinien stać lidar CHDS, adnak takaja norma nie zamacavana aficyjna.
Jašče adnym patencyjnym kandydatam na pasadu kanclera, pavodle infarmacyi Bild, ličycca ministr achovy zdaroŭja, člen CHDS Jens Špan. Vydańnie nie vyklučała, što jon moža vyłučycca na hetuju pasadu, kali jaho rejtynh budzie vyšejšy, čym u Łašeta. U jakaści mahčymaha pierajemnika Mierkiel niamieckija ŚMI taksama nazyvali premjer-ministra Bavaryi i staršyni Chryścijanska-sacyjalnaha sajuza (CHSS) Markusa Ziodera.
Mierkiel zajmaje pasadu kanclera čaćviorty termin zapar.
