MUS: Andrej Alaksandraŭ i Iryna Złobina apłačvali štrafy zatrymanych demanstrantaŭ
Namieśnik kiraŭnika MUS Hienadź Kazakievič prakamientavaŭ zatrymańnie 12 studzienia miedyjamieniedžara Andreja Alaksandrava i jaho dziaŭčyny Iryny Złobinaj.
Milicyja apublikavała aŭdyja dopytu Alaksandrava. Toj pryznajecca, što dapamahaŭ fondu BYHELP i z atrymanych hrošaj apłaciŭ kala 250 štrafaŭ demanstrantaŭ.
Milicyja traktuje heta jaje «finansavańnie pratesnaj dziejnaści».
Adznačajecca, što hrošy pakidalisia ŭ schovankach, adkul Alaksandraŭ uziaŭ bolš za 100 tysiač dalaraŭ ZŠA i jeŭra.
Suviaź z žurnalistam i miedyjamieniedžaram Andrejem Alaksandravym i Irynaj Złobinaj prapała dniom u aŭtorak, 12 studzienia. Tolki na nastupnyja sutki vyśvietliłasia, što Alaksandraŭ znachodzicca ŭ statusie padazravanaha, a zatrymany «ŭ suviazi z vyśviatleńniem dačynieńnia da dziejańniaŭ u Minsku, jakija hruba parušajuć hramadski paradak». Iryna znachodziłasia na Akreścina.
U čaćvier, 14 studzienia, u ofisie BiełaPAN, namieśnikam hiendyrektara jakoha ŭ 2015-2018 hh. byŭ Alaksandraŭ, prajšoŭ vobšuk, byli kanfiskavanyja vinčestary.
