Što heta za tancavalny fłešmob «Ijerusalim», da jakoha masava dałučajucca ŭsio novyja biełarusy?
Štotydniova ŭ internecie źjaŭlajucca novyja varyjanty pračytańnia mižnarodnaha fłešmobu «Ijerusalim». U Minsku, zdajecca, uvohule chutka nie zastaniecca rajona, dzie b miascovyja žychary ŭ bieł-čyrvona-biełym adzieńni nie stancavali razam pad adnu z samych zašazamlenych piesień. A z čaho ŭsio pačałosia? Chto napisaŭ hety trek i prydumaŭ virusny taniec pad jaho? Raskazvajem.
Aŭtarstva pieśni «Jerusalema» naležyć paŭdniovaafrykanskamu vykanaŭcu i pradziusaru Master KG. Ën naradziŭsia ŭ Limpopa ŭ 1996 hodzie i muzykaj cikaviŭsia ź dziacinstva. Dziakujučy dziadźku, što padaryŭ jamu kampjutar, zmoh ekśpierymientavać ź bitami ŭžo z 13 hod.
Albom muzyki «Skeleton Move» byŭ adznačany šmatlikimi muzyčnymi ŭznaharodami. U 2019 hodzie Master KG staŭ najlepšym mužčynam-artystam Paŭdniovaj Afryki. Ale mienavita vykanańnie «Jerusalema» ŭ duecie sa śpiavačkaj Nomcebo Zikode pryniesła jamu mižnarodnuju viadomaść. Admietna, što pieśnia vykonvajecca na movie zułu. Kali pierakładać, to asnoŭny sens nastupny: «Ijerusalim — moj dom, nie pakidaj mianie, ratuj mianie».
Na siońniašni momant klip Master KG sa śniežnia 2019 hoda pahladzieli amal 310 miljonaŭ razoŭ.
Jak źjaviŭsia taniec?
U aryhinalnym klipie niama i namioku na viadomy nam taniec. Usie hetyja ruchi prydumaŭ tancavalny kalektyŭ z Anhoły Fenómenos do Semba. Takim čynam jany adznačyli svajo piacihodździe, jakoje ŭžo vypała na karanavirusny pieryjad, tamu hrandyjoznaha śviatkavańnia nie było. Usio, što mahli artysty, — sabracca ścipłaj kampanijaj i ŭ siamiejnym kole paviačerać.
U raniejšych intervju kiraŭnik tvorčaj hrupy tłumačyŭ, što svaim tancam jany «chacieli pakazać momant ščaścia, ščyraść afrykanskaha naroda, asabliva žycharoŭ Anhoły. Pakazać, što možna być ščaślivym, nie majučy amal ničoha, u takija ciažkija časy, jakija my ŭsie siońnia pieražyvajem praz karanavirus».
Taki pasył pryjšoŭsia mnohim daspadoby, i voś užo pałymiany taniec vykonvali supracoŭniki avijakampanij, dzieci, baskietbalisty, daktary — tysiačy ludziej pa ŭsim śviecie. Mnohija adznačali, što taniec padymaŭ nastroj u niaprosty čas i abjadnoŭvaŭ.
A jak u Biełarusi?
U nas adnym z samych pieršych masava padtrymaŭ fłešmob rajon Novaj Baravoj.
Paśla hetaha biełarusaŭ było ŭžo nie spynić: štotydniova ŭ siecivie źjaŭlajucca ŭsio novyja videa. Da fłešmobu ŭžo dałučylisia Zialony Łuh, Čyžoŭka, Sierabranka, Aŭtazavod, Lebiadziny, Malinaŭka, Zasłaŭje, Laskoŭka, Mahiloŭ, Viciebsk i mnohija inšyja. Ludzi razam razvučvajuć ruchi, repietujuć, kab usio atrymałasia idealna.
Varta adznačyć, što ŭ Biełarusi taniec nabyŭ dadatkovy sens: heta jašče adzin sa sposabaŭ abjadnać susiedziaŭ takim voś viasiołym čynam. Praciah dvarovych inicyjatyŭ i zdarovaha hramadskaha jadnańnia na miascovym uzroŭni.
