Što heta za kulturny chab «Ok16», jaki prypyniŭ pracu
Adrazu niekalki arandataraŭ, što pravodzili svaje imprezy ŭ papularnaj art-prastory «Ok16» na tusovaj Kastryčnickaj vulicy, paviedamili pra admienu zapłanavanych mierapryjemstvaŭ i skasavańnie damoŭ. Imaviernaja pryčyna — pradpisańnie MNS. Sam ža chab, pavodle pradziusarki jaho prajektaŭ Iny Kavalonak, prypyniŭ pracu jašče letam. Raskazvajem, što heta za miesca i čym jano viadomaje.
Fota z sajta artbelarus.by
Svaje śpiektakli raptoŭna admianiła kampanija «Art Karparejšn», a Sučasny mastacki teatr, jaki sa žniŭnia pamianiaŭ try placoŭki, paśla sychodu z «Ok16» uvohule abviaściŭ ab prypynieńni dziejnaści. Jak piša Ina Kavalonak u svaim fejsbuku, kamanda chaba vyrašyła spynicca jašče letam: «Z časoŭ viesnavoha karancinu my syšli ŭ anłajn. Pracavali. Situacyja z karanavirusam nie palapšałasia, a ź pieradvybarnaj kampanijaj zakručvałasia. Kultžyćcio stała nie tak cikavaje publicy. Potym ŭ červieni pačaŭsia cisk na partniorskija prajekty Biełhazprambanka».
Try zavadskija pamiaškańni pa adrasie Kastryčnickaja, 16 u sakaviku 2017 hoda kupiŭ Biełhazprambank. Tady jon užo byŭ viadomy karparatyŭnaj kalekcyjaj z Šahałam i Sucinym, padtrymkaj mižnarodnaha teatralnaha fiestyvalu «Teart» i «Vosieńskim sałonam» z adsyłkaj da paryžskich «Viesnavych sałonaŭ».
Vysokija stoli i adsutnaść kałon dazvolili pieratvaryć prastoru ŭ teatralnuju zału i zrabić jaje prydatnaj dla pastanovak ekśpierymientalnaha teatra. Sapraŭdy, za čas isnavańnia «Ok16» siehmient alternatyŭnaha biełaruskaha teatra ŭmacavaŭsia. Tut byli pastaŭleny śpiektakli, jakija stali adnymi z najlepšych za apošnija hady, — «Vartavyja Tadž-Machała», «Kryžovypachodździaciej» ci «Z vučylišča». Vidavočna, siońnia «Ok16» źjaŭlajecca samaj prydatnaj placoŭkaj dla teatralnych trup «u vyhnańni».
U toj ža čas chab maje šerah pamiaškańniaŭ, dzie adbyvajucca jak teatralnyja fiestyvali, tak i kancerty akademičnaj muzyki, maštabnyja vystavy, adukacyjnyja mierapryjemstvy, IT-kanfierencyi dy inšaje.
Pavodle zadumy prastora musiła stać kulturnym inkubataram i kulturnym aksielerataram. «U inkubatary maładym kamandam dajecca šaniec z nula na lhotnych umovach stvaryć, naprykład, svoj biznes. Aksieleratar — miesca, kudy prychodzić užo žyvy prajekt, kab vyraści ŭ jakaści, pamierach i efiektyŭnaści. My chočam stać svojeasablivaj piasočnicaj, kudy možna pryjści i z nula niešta stvaryć, ale asnoŭnaja naša meta — dapamahčy vyraści prajektam, jakija ŭžo isnujuć», — tłumačyŭ u 2018 hodzie kiraŭnik prajekta Hieorhij Zaborski.
Za karotki čas «Ok16» staŭ samaj prestyžnaj alternatyŭnaj kulturnaj placoŭkaj horada. Letam 2019 hoda jaje art-dyrektaram stała Maryja Kaleśnikava, jana ž zaśpieła kryzis praz pandemiju — tady kamanda prastory pierajšła na 90-pracentnuju dystancyjnuju pracu i ščylna zaniałasia svajoj prysutnaściu ŭ virtualnaj prastory. Jak akazałasia, viarnucca da paŭnavartasnaj pracy joj nie daviałosia.
Miesiac tamu kinafiestyval Watch Docs Belarus musiŭ terminova pieranosić svaje mierapryjemstvy z «Ok16» u inšyja miescy praz, jak tłumačyłasia, ramontnyja raboty. Ciapier spyniena nie tolki praca kamandy «Ok16» — vidać, budynku taksama zabaroniena zdavać u arendu svaje pamiaškańni.
