MUS Ukrainy: Novyja zapisy pa Šaramiecie paćviardžajuć viersiju śledstva
U Ministerstvie ŭnutranych spraŭ Ukrainy miarkujuć, što novyja zapisy 2012 hoda, na jakich byccam by biełaruskija śpiecsłužby abmiarkoŭvajuć namier zabić žurnalista Paŭła Šaramieta vybuchoŭkaj, adpaviadajuć ciapierašniaj viersii śledstva.
A značyć, na spravie hrupy vieteranaŭ ATA i vałancioraŭ, jakich abvinavačvajuć u vykanańni zabojstva žurnalista, apublikavanyja zapisy nie adabjucca, zajaviŭ BBC śpikier MUS Arciom Šaŭčenka.
Zatoje advakaty abvinavačanych zajavili, što, na ich dumku, novyja źviestki całkam mianiajuć usiu spravu.
Zaraz fihurantaŭ pa spravie troje. Heta rok-muzyka i vajskoviec Andrej Antonienka, dziciačy chirurh i vałancior Julija Kuźmienka i vajskovaja miedsiastra Jana Duhar.
Pavodle viersii śledstva, Duhar dapamahała rychtavać złačynstva, a Antonienka i Kuźmienka byccam by niepasredna zakładali vybuchoŭku pad aŭto Šaramieta.
EUobserver: U 2012 kiraŭnik KDB Biełarusi abmiarkoŭvaŭ likvidacyju palityčnych emihrantaŭ, u tym liku Šaramieta
«U abvinavaŭčym akcie vyrazna pakazana, što ich dziejańni byli vyklikanyja inšymi niavyznačanymi asobami, — skazaŭ Šaŭčenka. — Niepasredna na razhlad u sudzie (spravy Antonienki, Kuźmienka i Duhar) heta naŭrad ci paŭpłyvaje, bo abvinavačanym stavicca ŭ vinu mienavita ŭdzieł u vykanańni hetaha złačynstva».
Pradstaŭnik MUS padkreśliŭ, što hetaja infarmacyja «paćviardžaje asnoŭnuju viersiju śledstva, što našy abvinavačanyja dziejničali niesamastojna, a vykonvali peŭnuju złačynnuju zadumu peŭnych niavyśvietlenych asob».
U toj ža čas Arciom Šaŭčenka vykazaŭ nadzieju, što hetaja novaja infarmacyja zmoža dapamahčy ŭ pošuku zamoŭcaŭ i arhanizataraŭ zabojstva.
Miž tym advakaty ličać, što novaja infarmacyja całkam mianiaje ŭsiu spravu.
Abarona śćviardžaje, što «raniej viersija datyčnaści biełaruskich śpiecsłužbaŭ naohuł nie daśledavałasia i nie razhladałasia». Pradstaŭniki abvinavačanych vykazvajuć aściarohi, što kiraŭnictva pravaachoŭnych orhanaŭ Ukrainy «moža śviadoma pakryvać jak zakazčykaŭ, tak i vykanaŭcaŭ».
Paŭła Šaramieta zabili 20 lipienia 2016 hoda - aŭtamabil, za rulom jakoha jon jechaŭ na pracu, vybuchnuŭ u centry Kijeva. Paźniej palicyja paćvierdziła, što vybuchoŭku padkinuli naŭmysna.
Praz try hady paśla zabojstva pradstaŭniki MUS i Hienprakuratury ŭ prysutnaści prezidenta Uładzimira Zialenskaha Publična pradstavili viersiju śledstva, pa jakoj zabojstva ździejśnili Kuźmienka, Antonienka i Duhar. Tady ž usich traich padazravanych zatrymali.
Antonienka ŭžo bolš za hod znachodzicca pad aryštam, Kuźmienka praviała pad vartaj siem miesiacaŭ, a zatym jaje adpuścili pad chatni aryšt, Duhar adpuścili pad zakład.
Pavodle apošniaj viersii śledstva, jany vykonvali zamovu «niavyśvietlenych asob» z metaj — «stvareńnie ŭ hramadstvie vielmi rezanansnaj padziei z metaj dalejšaj pravakacyi šmatlikich akcyj pratestu».
Usie troje admaŭlajuć datyčnaść da zabojstva.
