U Baranavičach sud prypyniŭ rašeńnie ab vysyłcy miascovaha aktyvista. Ale jaho ŭžo departavali ŭ Rasiju
Aleh i Taćciana Małaščanki. Fota ź siamiejnaha archiva
Aleh Małaščanka ŭ pačatku novaha hoda atrymaŭ pozvu źjavicca ŭ sud 14 studzienia. Pra dakumient raskazała žonka, jakaja zastałasia ŭ kvatery. Samoha ž Aleha jašče 30 śniežnia departavali ŭ Rasiju, pašpart jakoj jon maje, choć z 2004 hoda žyvie ŭ Baranavičach. Dziaržaŭnyja orhany zrabili heta, nie čakajučy rašeńnia suda pa spravie, piša «Inteks-pres».
1 śniežnia Małaščanka padaŭ apielacyjnuju skarhu na rašeńnie adździeła pa hramadzianstvie i mihracyi Baranavickaha HAUS u Brescki abłasny sud, ale da svajoj departacyi adkazu nie atrymaŭ. Taksama zahadzia jon napisaŭ u Baranavicki HAUS list ab tym, što jon nie moža vykanać patrabavańni adździeła pa hramadzianstvie i mihracyi, pakul nie pryjdzie adkaz na apielacyju.
U vyznačeńni Baranavickaha suda skazana, što sprava ab vysyłcy prypynienaja, pra heta raspaviała Taćciana Małaščanka, žonka Aleha. Jana ŭpeŭniena, što adździeł pa hramadzianstvie i mihracyi Baranavickaha HAUS «śpiecyjalna vysłaŭ muža z krainy da taho, jak my atrymali dakumient z suda».
Siamja Małaščankaŭ udzielničała ŭ šerahu nacyjanalnych prajektaŭ u Baranavičach, damahłasia adkryćcia biełaruskamoŭnaha kłasa ŭ horadzie. Paśla prezidenckich vybaraŭ ułady paličyli Aleha Małaščanku adnym z zavadataraŭ strajku na 558-m avijaramontnym zavodzie.
