U Hrodnie vieterynarnaja doktarka vychadziła novanarodžanaje lviania ŭ svajoj kvatery VIDEA
Niadaŭna ŭ pary lvoŭ Hrodzienskaha zaaparka naradziŭsia mały. Ale radasnaja padzieja ledź nie zaviaršyłasia trahična — praz 10 dzion ilvica pierastała karmić svajho małoha. Kłopat ab małym uziała na siabie vieterynarnaja doktarka Alena Kamarec, piša Źviazda.
Uvohule, naradžeńnie naščadka lvoŭ stała siurpryzam navat dla samich rabotnikaŭ zaaparka. Naprykancy vieraśnia padčas abchodu zahadčyca siekcyjaj drapiežnych žyvioł ubačyła, što lvica ŭ valjery nie adna.
— My čakali prypłod u minułym hodzie, kali naš leŭ Džoni prajaŭlaŭ intares da lvicy Piarsiei. Ale tady naščadak tak i nie źjaviŭsia. My padumali, što heta z-za ŭzrostu lvicy — usio ž taki joj 11 hadoŭ, i jana jašče ni razu nie była maci. Tamu źjaŭleńnie małyški hetaj vosieńniu stała dla ŭsich sapraŭdnym šokam, i razam z tym vielmi radasnaj padziejaj, — raskazała Alena Kamarec.
Rabotniki zaaparku rabili ŭsio, kab zabiaśpiečyć adpaviedny dohlad, cišyniu i spakoj dla maci i novanarodžanaj. Staralisia nie turbavać jaje, hatavali śpiecyjalnuju ježu. I ŭsio išło dobra. Ale praz 8—10 dzion u zaaparku stali zaŭvažać, što źvierania nie aktyŭnaje, viałaje, amal nie ŭstaje. Z dapamohaj videanazirańnia ŭstanavili, što lvica paprostu nie kormić svajho małoha. Było vyrašana terminova zabrać jaho ad maci i pieravieści na štučnaje karmleńnie.
A pakolki va ŭmovach zaaparku zabiaśpiečyć kruhłasutačny nahlad niemahčyma, vieterynarka Alena Kamarec uziała na siabie abaviazki matuli i zabrała małuju da siabie ŭ kvateru. Źvierania było vielmi hałodnaje, ale treba było davać ježu pastupova, pačali karmić małočnaj sumieśsiu. Pastupova ŭviali ŭ racyjon kazinaje małako i tvaroh, jaki sami i rabili. Paźniej pryvučyli da zvykłaj ježy drapiežnikaŭ — miasa. U kvatery vieterynara źvierania praviało niekalki tydniaŭ.
— Było šmat kłopataŭ, ale zaraz situacyja stabilizavałasia, małaja lvica narmalna stała jeści, tamu było vyrašana viarnuć jaje ŭ zaapark, — paviedamiła surazmoŭca. — Ale dla šyrokaha ahladu jana niedastupna. My sami starajemsia jaje naviedvać paasobku, bo pry vialikaj kolkaści ludziej małoje pałochajecca, vykazvaje niervovaść.
U novaj nasielnicy zaaparka ŭžo jość i svaja mianuška — jaje nazvali Džyna. Heta hučnaje i karotkaje imia, jakoje, pa słovach rabotnikaŭ zaaparka, dobra ŭsprymajecca na słych. Džyna dahladajecca zhodna z hrafikam. Jość u jaje i poźniaje viačerniaje karmleńnie, dziela jakoha rabotniki zaaparka śpiecyjalna prychodziać u 9—10 hadzin viečara.
Darečy, baćku Džyny taksama hadavali ŭ zaaparku z dvuch miesiacaŭ. Jon trapiŭ siudy vielmi słabym ź pierasoŭnaha zaaparka. Jaho doŭha lačyli ad traŭmaŭ i inšych chvarob. U Hrodnie jon užo 8 hod. A voś Piarsieja prybyła siudy ŭ adnahadovym uzroście z Kalininhradskaha zaaparka.
