Pjantos kidaŭsia na chłopcaŭ ź bieł-čyrvona-biełym ściaham. Spravu nie zaviali, bo demanstranty «destabilizujuć situacyju»
Historyja adbyłasia jašče 2 vieraśnia. Pjany chłopiec pačaŭ kidacca na minakoŭ: pahražaŭ im «rozačkaj» i špulaŭ meblu letniaha kafe. U vyniku debašyra vyrubiŭ jaho ž siabar, a milicyja paličyła, što ŭsio było ŭ ramkach zakona.
Abstaivny zdareńnia vykładzienyja ŭ pratakole, jaki źjaviŭsia ŭ internecie. Heta admova ŭ zaviadzieńni kryminalnaj spravy.
Zhodna z dakumientam, niejki Michaił Fiodaraŭ vypiŭ ź siabram dva litry piva. Pa darozie dadomu jon zaŭvažyŭ chłopca ź bieł-čyrvona-biełym ściaham na plačach.
«Michaiła heta aburyła, bo jon nieaficyjna pracuje ŭ budaŭničaj śfiery, a ŭ suviazi ź situacyjaj paśla vybaraŭ prychilniki «bieł-čyrvona-biełaha» ruchu nakalajuć abstanoŭku ŭ krainie, namahčyma znajści pracu», — havorycca ŭ dakumiencie.
Michaił skazaŭ chłopcu źniać ściah, toj admoviŭsia, za jaho zastupilisia jašče niekalki čałaviek sa ściahami. Jany pačali kryčać Michaiłu: «Hańba!»
«Usie jany chacieli pabicca i pavodzili siabie nieadekvatna», — patłumačyŭ Michaił. Jon nie prydumaŭ ničoha lepšaha, jak zrabić z butelki «rozačku» — chacieŭ takim čynam napałochać ludziej sa ściahami. A taksama pačaŭ špulacca meblaj ź letniaj placoŭki bara.
«Hetaje dziejańnie mieła pad saboju znak pratestu suprać dziejańniaŭ pa destabilizacyi abstanoŭki ŭ krainie i ich niapravilnych pavodzinaŭ», — tłumačyŭ Michaił.
Paśla hetaha siabar Michaiła ŭdaryŭ jaho ŭ tvar. Michaił supakoiŭsia i adklučyŭsia. Darečy, da siabra jon pretenzij nie maje.
Pryjechała milicyja, Michaiła zabrali. Ale ž składu złačynstva ŭ jaho dziejańniach nie znajšli.
«Dziejańni nie byli biespadstaŭnymi i byli ździejśnienyja pa asabistych matyvach, vyklikanych tym, što asoby, jakija chodziać pa vulicach vialikimi hrupami ź niezarehistravanaj simvolikaj (bieł-čyrvona-bieły ściah i hierb «Pahonia») destabilizujuć situacyju ŭ dziaržavie, u suviazi z čym jon [Michaił] nie moža znaści sabie miesca pracy i pastajanny zarobak», — havorycca ŭ dakumiencie.
U vyniku na Michaiła, jaki spjanu pahražaŭ «rozačkaj» i kidaŭsia kresłami, nie stali zavodzić spravu za chulihanstva.
Na praciahu sutak «Naša Niva» sprabavała atrymać kamientar ad pravaachoŭnikaŭ nakont situacyi, adnak marna.
