Karanik pra źbitaha śpiecnazam padletka: U mordu atrymaŭ i byŭ pad psichatropami. Ale pa daviedkach narkotykaŭ nie było
Padčas sustrečy z rabočymi na «Hrodna Azocie» 26 žniŭnia hubiernatar Hrodzienskaj vobłaści i były ministr achovy zdaroŭja Uładzimir Karanik skazaŭ, što 16-hadovy padletak, jaki lažaŭ u komie ŭ 3-j dziciačaj balnicy Minska, «potym vyjšaŭ na psichoz», i ŭ jaho «pa klinicy — atručeńnie psichatropami». Adnak, pa słovach advakata padletka Stanisłava Abrazieja, i pa dadzienych z epikryzu i daviedak, jakija jość u rasparadžeńni redakcyi tut.by, ni ałkaholu, ni narkatyčnych rečyvaŭ u arhaniźmie chłopca nie było.
Žurnalistam nie dazvolili prysutničać na sustrečy, paśla razmovy z rabotnikami zavoda Uładzimir Karanik admoviŭsia ad hutarki z presaj. Tym nie mienš u rasparadžeńni tut.by apynuŭsia aŭdyjozapis sustrečy.
Padčas jaje pytańnie Uładzimiru Karaniku zadaŭ adzin z supracoŭnikaŭ zavoda.
— Što tyčycca imidžu, to imidž straciŭ nie tolki «Azot», a i Respublika Biełaruś u cełym straciła.
— Tak? — spytaŭ Karanik.
— Tak, tak, — daniesłasia z zały.
— Treba pryznać, što niejkaja falsifikacyja na vybarach była, nieapraŭdanaja žorstkaść dziaržaŭnych struktur taksama była. Čamu ludzi chodziać uvieś čas? Vy nie zadavali sabie takoje pytańnie? - - udakładniŭ supracoŭnik zavoda.
— Prabačcie, možna adrazu ŭ režymie dyskusii, razumiejecie, my pryvykli, skažam tak, da abahulnieńniaŭ — «nieapraŭdanaja žorstkaść dziaržaŭnych struktur», ale heta padmiena paniaćciaŭ. Byli vypadki pieravyšeńnia jak by, sapraŭdy, asobnych supracoŭnikaŭ, i tut u kožnym vypadku treba raźbiracca. Kali ŭsie raskazvajuć pra toje, što ŭsie biełyja i puchnatyja, kali my bačym fejki, prabačcie, mianie pra toje, što biedny, 16 hadoŭ, źbity da paŭśmierci, u komie lažyć u 3-j dziciačaj balnicy Minska. Pamiatajecie heta? A ja viedaju, tamu što na kansiliumy vyjazdžali: pierałom skułavaj kostki, sutarhavy sindrom niezrazumieła čaho, čerap ceły, siniakoŭ na hałavie niama, MRT čystaje (dalej nierazborliva). Potym źniali, potym vyjšaŭ na psichoz, pa klinicy — atručańnie psichatropami.
Nu, naturalna, u mordu atrymaŭ, prabačcie, u tvar atrymaŭ, pierałom skułavaj kostki jość, ale inšych siniakoŭ niama ni adnaho, a ŭsiudy było «źbity da paŭśmierci».
Na siońniašni momant u kožnym vypadku treba razabracca, ale razabracca nie kali ŭsie na emocyjach biehajuć. U nas usich pasłuchać, usie albo chadzili pa chleb, albo, prabačcie mianie, prosta stajali ŭbaku, pahulać vyjšli.
A toje, što apioki ad śviatłošumavoj hranaty — dyk heta, prabačcie mnie, kinuli z mašyny, jakaja prajazdžała mima.
A toje, što śviatłošumavyja hranaty ŭžyvalisia tolki ŭ dvuch miescach i tolki ŭ pieršaj linii, pra heta ŭsie nie viedajuć. Baćki raspaviadajuć: dzicia prosta vyjšła. Tamu na siońniašni momant možam dalej pładzić kryŭdy, ale, pa-mojmu, pravilniej supakoicca, pačać narmalna pracavać i dać u spakojnym režymie ŭsim razabracca, što adbyłosia.
Chočacie, kab vas pačuli, palityčnyja patrabavańni vykazvajuć palityčnyja partyi, a, prabačcie mianie, nie vulica i nie stačkamy. Tamu arhanizoŭvajciesia, zakon, prabačcie, ab palityčnych partyjach stary jak śviet, i jon dziejny, arhanizoŭvajciesia, vyznačyciesia z kiraŭnictvam, z Palitradaj, kab było zrazumieła, z kim havaryć naohuł, — skazaŭ Uładzimir Karanik.
Jak my razumiejem, u razmovie havorka išła pra 16-hadovaha padletka Cimura M., u reanimacyju 3-j dziciačaj balnicy Minska jaho dastavili z Partyzanskaha RUUS 13 žniŭnia, a 12 žniŭnia zatrymali ŭ rajonie Kamiennaj Horki. Chłopiec byŭ u miedykamientoznaj komie, jon vielmi mocna źbity, u jaho byli čerapna-mazhavaja traŭma, strasieńnie hałaŭnoha mozhu, adkryty pierałom skuła-arbitalnaha kompleksu, sutarhavy sindrom, paraarbitalnaja hiematoma sprava, množnyja ŭdary miakkich tkanin i kaniečnaściaŭ, traŭmatyčnyja erozii rahavicy abodvuch vačej.
Jak raspavioŭ Stanisłaŭ Abraziej, advakat Cimura, pry pastupleńni ŭ balnicu ŭ arhaniźmie chłopca nie było ni ałkaholu, ni narkatyčnych rečyvaŭ.
— Heta nie pakazana ni ŭ epikryzie, ni ŭ nivodnaj z daviedak, ni ŭ historyi chvaroby. Bolš za toje, u nas jość daviedka i zaklučeńnie, dzie napisana, što ŭ arhaniźmie nie vyjavili ni narkotykaŭ, ni psichatropnych rečyvaŭ, na jakija pravodziŭsia test.
Kali čałaviek traplaje z traŭmami ŭ balnicu, jamu robiać zabor kryvi i praviarajuć, ci znachodzicca jon u ałkaholnym apjanieńni i hetak dalej, kab, kali buduć nastupstvy i praciah hetaj historyi, hety fakt byŭ vyjaŭleny. Tut pratakoł u miedycynskaj častcy byŭ vykanany, zabor byŭ zrobleny i kroŭ padvierhnułasia analizu.
U epikryzie, jakija siamja Cimura pieradała ŭ redakcyju, pakazana, što 13 žniŭnia ŭ 12.51 byŭ kansilium (pastupiŭ u balnicu padletak u 2.50 taho ž dnia), i ŭ častcy abjektyŭnych dadzienych adznačana, što pa vynikach łabaratornaha daśledavańnia dadzienych pa atručvańni niama (narkatyčnyja, psichatropnyja, taksičnyja rečyvy nie vyjaŭlenyja).
Taksama ŭ redakcyi tut.by jość vyniki łabaratornaha daśledavańnia, nakiravanaha 13 žniŭnia, ab tym, što ŭ kryvi padletka etyłavaha śpirtu niama. U tym liku jość i vyniki daśledavańnia mačy na najaŭnaść narkatyčnych srodkaŭ, psichatropnych, taksičnych abo inšych adurmańvajučych rečyvaŭ — i jany taksama admoŭnyja.