U Biełarusi ciapier možna apłačvać pakupki biez terminała
Biełaruś stała adnoj ź pieršych krain u śviecie, dzie možna prymać apłatu praz telefon. Mabilny ekvajrynh biez płaciežnaha terminała zapuścili Priorbank i Visa. Raźličycca možna jak kartkaj, tak i smartfonam, razumnymi hadzińnikami, branzaletam abo kalcom.
Prezientacyja i pres-kanfierencyja prajšli ŭ anłajnie
Za miažoj technałohija viadomaja jak Tap-to-Phone, a ŭ Biełarusi atrymała nazvu PriorSoftPOS. Jana pieratvaraje zvyčajny smartfon u bankaŭski terminał. Dla raźlikaŭ nie patrabujecca inšaje płaciežnaje abstalavańnie, jak i mabilny kartrydar. Usie hetyja funkcyi biare na siabie dadatak, a źviestki ab tranzakcyi pastupajuć naŭprost u «vobłačnaje» schovišča.
Technałohija dazvalaje raźličycca kartkaj luboha banka — jak biełaruskaha, tak i zamiežnaha. Heta taksama možna zrabić smartfonam, razumnymi hadzińnikami, płaciežnym branzaletam abo kalcom. Adzinaje patrabavańnie — pryłada pavinna padtrymlivać NFC.
Padčas apłaty pradaviec uvodzić na telefonie sumu pakupki, a pakupnik padnosić kartu, smartfon abo razumny hadzińnik. Pry raźlikach na sumu ad 80 rubloŭ treba ŭvieści PIN-kod. Apłata zajmaje doli siekundy, paśla čaho na ekranie źjavicca ček, jaki možna adpravić pa SMS ci elektronnaj pošcie.
Dadatak, jaki pieratvaraje telefon u terminał, možna spampavać biaspłatna. Technałohija dastupnaja jak kampanijam, tak i indyvidualnym pradprymalnikam. Pradaŭcam patrebny smartfon na Android, a pakupniki mohuć vykarystoŭvać iPhone i luby inšy telefon z padtrymkaj NFC.
Siarod pieravah — adsutnaść patreby ŭ kupli i absłuhoŭvańni abstalavańnia, vysokaja chutkaść i prastata raźlikaŭ. Servis całkam biaśpiečny, jak i apłata praz terminał.
Techničnuju realizacyju prajekta zabiaśpiečyła kampanija-rezident Parka vysokich technałohij IBA Group. Dla jaje heta ŭžo nie pieršy prajekt pa stvareńni i ŭkaranieńni sistem płaciažoŭ jak unutry krainy, tak i za miažoj.
Pradaŭcy pakul mohuć karystacca technałohijaj biaspłatna. Pry padklučeńni da kanca červienia dziejničajuć «apłatnyja vakacyi» na 3 miesiacy. Dalej budzie spahaniacca kamisija, pryčym jana budzie nižejšaj u vypadku zaličeńnia vyručki na rachunak u Priorbanka.
