Ci mohuć źniać z vybaraŭ inicyjatyŭnuju hrupu Śviatłany Cichanoŭskaj? Tłumačym
Paśla pravakacyi ŭ Hrodnie 29 maja, kali zatrymali Siarhieja Cichanoŭskaha i jahonych paplečnikaŭ, mnohija ŭ internecie vykazvali viersiju, što ŭ bližejšyja dni z vybaraŭ mohuć źniać inicyjatyŭnuju hrupu Śviatłany Cichanoŭskaj.
Adnak pakul što hetaha tak i nie adbyłosia. Čamu? «Naša Niva» spytała ŭ palitołaha Juryja Čavusava, jaki maje status naziralnika pry CVK.
«U Vybarčym kodeksie pra vyłučeńnie kandydataŭ u prezidenty jość tolki adzin artykuł — 61-y. Tam apisvajecca, jak rehistrujucca inicyjatyŭnyja hrupy, jak źbirajucca podpisy, jakija podpisy praviarajucca, jakija ličacca niesapraŭdnymi.
Pracedury źniaćcia inicyjatyŭnaj hrupy za niejkija parušeńni niama.
Kali b spadaryni Lidzii Jarmošynaj ci Alenie Dmuchajle (sakratar CVK — «NN») pastupiŭ zahad skasavać rehistracyju, to ja dumaju, što jany b mahli admianić raniejšaje rašeńnie ab rehistracyi. Naprykład, skazać, što pry bolš padrabiaznaj praviercy členaŭ inicyjatyŭnaj hrupy znajšli niejkija parušeńni. Ale heta budzie vidavočna niepravavoje dziejańnie.
Zrešty, u biełaruskaj pravavoj sistemie CVK moža rabić što zaŭhodna, abhruntoŭvajučy palityčnaj metazhodnaściu. Vyklučać takoje niemahčyma.
U artykule 68 Vybarčaha kodeksa prapisanyja padstavy dla admovy ŭ rehistracyi kandydatam u prezidenty, siarod ich — «nievykanańnie patrabavańniaŭ, praduhledžanych hetym kodeksam». Apošni punkt mohuć prymianić da Cichanoŭskaj. Kali jość aryšty, administracyjny pieraśled, parušeńnie praviłaŭ praviadzieńnia pikietaŭ. Dla ich hetaha moža być dastatkova, kab admović u rehistracyi.
Kali CVK usio ž zdymie inicyjatyŭnuju hrupu Cichanoŭskaj, to heta budzie absalutna novaja reč. Ja admysłova praviaraŭ: na prezidenckich vybarach takoha nikoli nie było. Adnosna parłamienckaj i miascovaj kampanij ja taksama takoj infarmacyi nie znajšoŭ.
Inicyjatyŭnaj hrupie mohuć vynieści papiaredžańnie. Jość jašče častka 3 artykuła 49 «Adkaznaść za parušeńni, jakija ŭstanoŭlenyja kodeksam». Faktyčna toje, u čym abvinavačvajuć Cichanoŭskaha — tam napisana, što ŭ vypadku parušeńnia inicyjatyŭnaj hrupaj praviłaŭ kodeksa pretendent atrymlivaje papiaredžańnie.
U vypadku druhoha papiaredžańnia CVK moža admović u rehistracyi ci admianić rašeńnie ab rehistracyi kandydata. Ale papiaredžańni, navat dva, nie robiać inicyjatyŭnuju hrupu niesapraŭdnaj, nie spyniajuć zbor podpisaŭ. Nijakija papiaredžańni nie mohuć skasavać status inicyjatyŭnaj hrupy», — skazaŭ Jury Čavusaŭ.
Takim čynam, da 19 červienia zborščyki podpisaŭ za Śviatłanu Cichanoŭskuju mohuć pracavać absalutna lehalna. A potym pačniecca novy etap vybarčaj kampanii i praviły tam buduć užo inšymi.
