Druhim čałaviekam u Kazachstanie staŭ 49-hadovy palityk novaha pakaleńnia
Maŭlen Sahatchanuły Ašymbajeŭ — fota sa staronki palityka ŭ fejsbuku
Maŭlen Sahatchanuły Ašymbajeŭ staŭ novym śpikieram sienata Kazachstana. Zhodna z Kanstytucyjaj, heta druhaja pasada ŭ dziaržavie paśla prezidenta.
Da 2 maja śpikierkaj sienata była dačka šmathadovaha kiraŭnika krainy Nursułtana Nazarbajeva. Šmat chto mierkavaŭ, što jana stanie pierajemnicaj, a prezident Kasym-Žamart Takajeŭ — pierachodnaja fihura.
Adnak niečakany krok novaha prezidenta ŭsio pamianiaŭ.
Ašymbajeŭ — čałaviek z koła Takajeva. Jon byŭ kiraŭnikom jaho pieradvybarčaha štaba, paśla paŭhoda byŭ pamočnikam i, narešcie, apošnija čatyry z pałovaj miesiaca byŭ namieśnikam kiraŭnika Administracyi prezidenta.
Jak i Takajeŭ, jon syn kazachskaha piśmieńnika. Vychadziec z Ałmaty, byłoj paŭdniovaj stalicy, jon vyvučyŭsia na palitołaha ŭ čas pierabudovy, a paśla stažyravaŭsia ŭ najlepšych univiersitetach ZŠA. Jon havoryć jak pa-kazachsku (heta jaho rodnaja mova), tak i pa-rusku i pa-anhlijsku.
Baćka novaha kiraŭnika sienata byŭ piśmieńnikam i teležurnalistam. U 1991-m jon staŭ kiraŭnikom telebačańnia krainy, ale pamior 26 žniŭnia, nie vytrymaŭšy niervovaha napružańnia ŭ čas putča HKČP i vialikich pieramien. «Sahatchanuły» — heta kazachski varyjant imieni pa baćku. Mama Ašymbajeva — taksama kazachskamoŭnaja piśmieńnica i pierakładčyca. Jana pierakłała na kazachskuju tvory Andersena i Amadu.
U Maŭlena Ašymbajeva try dački.
Karjeru Maŭlen Ašymbajeŭ rabiŭ jak analityk. Jon uznačalvaŭ Centr analizu i stratehičnych daśledavańniaŭ Administracyi prezidenta Kazachstana, paśla pracavaŭ u Radzie biaśpieki krainy.
Pra palityčnyja pazicyi Ašymbajeva śviedčyć toje, što jaho ličać inicyjataram aryštaŭ prychilnikaŭ DNR i ŁNR na terytoryi Kazachstana. Zbor srodkaŭ u padtrymku prarasijskich sił Danbasa kazachi paličyli ekstremisckaj dziejnaściu.
Padciahnuty i małady Ašymbajeŭ naležyć da novaha pakaleńnia kazachskaj elity. U toj ža čas jon nie čužy siłavikam.