Maštabnaje daśledavańnie francuzskich epidemijołahaŭ pakazała, jakaja dola nasielnictva ŭžo pieraniesła karanavirus
Daśledavańnie francuzskich epidemijołahaŭ dało samuju poŭnuju na hety momant statystyku, jaki pracent nasielnictva ŭžo vypracavaŭ da karanavirusa imunitet i kolki składaje śmiarotnaść ad karanavirusa ŭ roznych uzrostavych hrupach.
Łambardyja, Ńju-Jork, Madryd, Elzas — u mnohich rehijonach i haradach śvietu śmiarotnaść pieravysiła płanku 0,1-0,2% ciaham usiaho dvuch miesiacaŭ raspaŭsiudu karanavirusa.
I heta tolki ŭličanyja śmierci — kali pacyjentu byŭ zrobleny dyjahnaz. Akramia taho, častka ludziej pamiraje doma abo biez zroblenaha analizu. Ale navat hetaja ličba pakazvaje maštab prablemy, ź jakoj sutyknułasia čałaviectva.
U Łambardyi (rehijon u Italii z centram u Miłanie) pa stanie na 22 krasavika zarehistravanyja 12 740 śmierciaŭ. Nasielnictva rehijona składaje 10,1 miljona čałaviek. Takim čynam, kaeficyjent śmiarotnaści ad karanavirusa za dva miesiacy tam skłaŭ jak minimum 0,12%.
Jašče bolš dramatyčnaja situacyja skłałasia ŭ tych rajonach Łambardyi, dzie virus raspaŭsiudziŭsia najbolš. Tak, u pravincyi Bierhama ź jaje 1,1 miljona žycharoŭ pracent śmiarotnaści dasiahnuŭ 0,26%.
U Madrydzie śmiarotnaść skłała 0,11%, amal takoha ž uzroŭniu jana siahnuła ŭ druhim pa stupieni ŭražanaści rehijonie Ispanii — Kastylii-Łamanča.
Uzrovień 0,1% pieravysiła śmiarotnaść i ŭ štacie Ńju-Jork u ZŠA, dzie zarehistravana bolš za 20 tysiač śmierciaŭ.
Karanavirus začapiŭ nie tolki miehapolisy, ale i małyja haradki. Takija jak San-Maryna ŭ Italii. U hetaj mikradziaržavie z 35 tysiačami žycharami ad karony pamierli ŭžo 40 hramadzian, abo 0,12% nasielnictva.
My časam abstraktna ŭsprymajem pracentnyja pakazčyki, tym bolš droby, jak i čužyja biedy. Adnak možna ŭjavić heta ŭ prajekcyi na svaju krainu. Taki ž pracent ad nasielnictva Biełarusi — heta bolš za 11 tysiač čałaviek.
Kali virus šyroka pranikaje ŭ papulacyju, to spynić jaho ciažka. Va ŭsich vyšej pieraličanych rehijonach kolkaść novych zaražeńniaŭ zastajecca davoli vysokaj. Ale jana prynamsi zastajecca bolš-mienš na adnym uzroŭni, a nie raście ŭ hieamietryčnaj prahresii, jak było, kali ludzi nie pieraścierahalisia.
Navukoŭcy pakul nie rašajucca sprahnazavać, kali pandemija pojdzie na spad, bo virus zusim mała vyvučany. Pry najhoršym scenary heta zdarycca tady, kali imunitet vypracuje bolšaść nasielnictva. Akurat ciapier adrazu ŭ niekalkich krainach startujuć vialikija daśledavańni na vyjaŭleńnie antycieł da karanavirusa, jakija pakažuć, na jakim etapie pandemija ciapier. Jość spadziavańni, što praces napracoŭki hrupavoha imunitetu akažacca chutki. Adnak raniej času rassłablacca nie treba.
Pa vynikach daśledavańnia, praviedzienaha Instytutam Pastera, centram Inserm Univiersiteta Sarbona i Słužbaj achovy zdaroŭja Francyi, była stvoranaja matematyčnaja madel, jakaja pakazała, što da 11 maja, kali Francyja maje pačać asłablać karancinnyja abmiežavańni, u krainie karanavirus pieraniasuć usiaho tolki 5,7% nasielnictva.
Pry hetym daśledčyki vyjavili, što ŭ Francyi špitalizacyja spatrebiłasia prykładna 2,6% zaražanych ludziej. A śmiarotnaść składaje prykładna 0,53% ad ahulnaj kolkaści ludziej, jakich začapiŭ virus.
Hety pracent mizerna mały siarod dziaciej i moładzi da 20 hadoŭ (0,001%), ale vysoki (8,3%) va ŭzrostavaj hrupie 80+.
0,53% — heta namnoha mienš, čym mierkavałasia raniej, ale ŭsio adno našmat — u 10 razoŭ — bolš, čym pry zvyčajnym hrypie.
Dziakujučy strohim karancinnym abmiežavańniam indeks repradukcyi virusa ŭ Francyi źniziŭsia z 3,3 da 0,5, pakazała daśledavańnie.
