Inicyjatarku studenckaj zabastoŭki i akcyi «Cha-cha ja tut pamru» adličyli z univiersiteta
Liza Prakopčyk vučyłasia na 4-m kursie Mienskaha dziaržaŭnaha linhvistyčnaha ŭniversytetu, piša «Radyjo Svaboda».
U sakaviku dziaŭčyna aktyŭna zaklikała studentaŭ da samaizalacyi, choć aficyjnaha karantynu administracyja ŭniversytetu nia ŭvodziła.
«Adličyli za propuski», — kaža Liza Prakopčyk i tłumačyć, što ź jurydyčnaha boku adličeńnie zakonnaje. Ale sama jana ličyć jaho palityčna matyvavanym.
«Na fakultecie jość ludzi, u jakich pa 150 hadzin propuskaŭ u miesiacaŭ, i ich nie adličajuć. U mianie za sakavik było 60-65 hadzin propuskaŭ, i mianie adličyli», — kaža jana.
Lizavieta kaža, što ŭ śniežni źjaždžała za miažu pa hramadzkich spravach i taksama mieła inšyja propuski zaniatkaŭ. Za ŭvieś čas vučoby, kaža, jana nia mieła pierazdač, aproč fizkultury.
Dziaŭčyna kaža, što ŭ suviazi ź jejnaj aktyŭnaściu jaje ŭ administracyju nie vyklikali.
«Kali ja była na samakarantynie, mnie navat nie zvanili z administracyi, choć usim maim adnahrupnicam zvanili i pytali, dzie jany znachodziacca», — kaža Lizavieta.
«Ja dumaju, što ja sama vinavataja, ale heta i palityčna matyvavana. Ja viedaju šmat ludziej, jakija nia chodziać na zaniatki, zdajuć sesii z čaćviortaha razu, i ich nie vyklučajuć, — tłumačyć Liza. — Ja budu abskardžvać hetaje rašeńnie, bo va ŭnutranym dakumencie ŭniversytetu napisana, što ŭ pracesie navučańnia studenty majuć prava na zachavańnie svajho žyćcia i zdaroŭja. Ja liču, što samakarantyn — heta i jość zachavańnie majho žyćcia i zdaroŭja. Chutčej za ŭsio, heta nie spracuje, ale pasprabavać treba».
Sytuacyja Lizaviety admysłovaja, bo jana pastupała pa metavym nakiravańni. Heta aznačaje, što jana budzie abaviazanaja viarnuć hrošy za atrymanuju adukacyju. Suma moža siahać niekalkich tysiač dalaraŭ.
Kiraŭnictva VNU: «Jana nie naviedvała zaniatki i nie vykonvała zadańni»
«Lizavieta była vyklučanaja za systematyčnaje na praciahu navučalnaha hodu nienaležnaje vykanańnie abaviazkaŭ navučenca, kali da jaho raniej užyvalisia miery dyscyplinarnaha spahnańnia, — tłumačyć «Radyjo Svaboda» prarektar pa vychavaŭčaj pracy MDŁU Ŭładzimier Paškievič. — Heta artykuł 79, punkt 5.8 Kodeksu RB ab adukacyi. U Lizaviety ź vieraśnia pa krasavik try vymovy za toje, što jana nie naviedvała zaniatki».
Natalla Łapcieva, dekan fakultetu niamieckaj movy, na jakim vučyłasia Lizavieta, dadaje:
«Toje, što jana ŭ hetym miesiacy nie była atestavanaja pa ŭsich dyscyplinach pieršaj zamiežnaj movy, heta dla nas surjoznaje adchileńnie, bo z nastupnaha hodu našyja studenty iduć na praktyku ŭ škołu. I my b chacieli, kab jany tam hodna vykładali niamieckuju movu».
«Tamu dalej takaja sytuacyja nie mahła praciahvacca, — kaža Ŭładzimier Paškievič. — Čałaviek nie naviedvaje zaniatki i nie vykonvaje zadańni. Jana kaža, što jana znachodziłasia na samaizalacyi. Ale tyja studenty, jakija nie naviedvajuć [zaniatki. — RS], jany choć vykonvajuć chatnija zadańni, a Lizavieta hetaha nie rabiła».
Natalla Łapcieva kaža, što Lizavieta pryjšła va ŭniversytet z dobraj padrychtoŭkaj. «Pieršyja jaje dasiahnieńni byli — 7 bałaŭ pa ŭsich dyscyplinach, jakija jana ŭ nas vyvučała. Ale propuski zaniatkaŭ pryvodzili da taho, što jaje navučalnyja dasiahnieńni pačali źnižacca. I ŭžo na apošniaj sesii jaje siaredni bał byŭ 5,3», — kaža dekan.
Palityčnyja padstavy adličeńnia Prakopčyk administracyja admaŭlaje.
«Čamu Lizavieta ź pieršaha kursu nie kazała pra heta, kali jana adbyvała 13 sutak aryštu, i nichto ž jaje nie vyklučaŭ, — kaža prarektar Paškievič. — U nas studenty roznych palityčnych pohladaŭ i vykazvajuć svaje pazycyi pa-roznamu. Tyja, chto vučycca, jany i praciahvajuć vučycca».
